Romualdez arestado na!

ISINILBI ng mga awtoridad ang warrant of arrest laban kay dating House Speaker at kasalukuyang Leyte 1st District Rep. Martin Romualdez habang ito ay na-confine sa Cardinal Santos Medical Center nitong Lunes ng gabi, Setyembre 7.

Kinumpirma ni Department of the Interior and Local Government (DILG) Secretary Jonvic Remulla na opisyal nang itinuturing na person deprived of liberty (PDL) ang dating House leader matapos nitong tanggapin ang warrant sa kaniyang silid sa ospital.

Agad ding isinailalim si Romualdez sa mga kinakailangang booking procedure at pagbasa ng kaniyang mga karapatan sa pamumuno ng mga awtoridad sa loob mismo ng pasilidad.

Ayon sa pahayag ng DILG, naisugod sa ospital ang mambabatas matapos makaranas ng cardiovascular event, pagtaas ng presyon ng dugo, at anxiety attack nang mabalitaan ang paglabas ng kautusan ng Sandiganbayan.

Nakatakda namang manatili ang mga bantay mula sa pambansang pulisya sa labas ng kaniyang silid at sa paligid ng ospital habang patuloy na sinusuri ng mga doktor ang kaniyang lagay ng kalusugan.

Muling tiniyak ng pamahalaan na agad na ililipat si Romualdez sa pasilidad ng kulungan sa Quezon City Jail sa Payatas sa sandaling magbigay ng clearance ang mga medikal na dalubhasa na maaari na siyang lumabas.