Carpio: Si President ang dapat magsalita sa tensyon sa West Phil. Sea

TANGING si Pangulong Rodrigo Duterte at hindi ang sinumang miyembro ng gabinete nito ang dapat magsalita sa isyu ng nagaganap na tensyon sa West Philippine Sea (WPS).

Pahayag ito ni dating Supreme Court Associate Justice Antonio Carpio dahil ang China ay nakikinig lamang sa pinakamataas na lider ng bansa.

Ayon kay Carpio, minamaliit pa rin ng Malakanyang ang presensya ng Chinese vessels sa WPS, sa kabila nang matitinding pahayag nina Department of Foreign Affairs (DFA) Secretary Teodoro Locsin, Jr. at Defense Secretary Delfin Lorenzana sa naturang usapin.

Isa aniya napakahalagang isyu ang presensya ng Chinese vessels sa WPS lalo pa’t nakasalalay dito ang soberanya ng Pilipinas kaya’t dapat nang magsalita ng Pangulong Duterte at panindigang pag-aari ng Pilipinas ang lugar.

Gayunman, inihayag ni Carpio na hindi naman garantiya ang pagsasalita ng pangulo sa WPS issue na aalis ang mga barko ng China, subalit mararamdaman aniya ng Asian powerhouse ang init dahil mawawalan sila ng isang kaibigan.