Bagong Fabella Hospital, inagurahan nina PRRD, Bong Go

NANGAKO si Senator at Senate committee on health chair Christopher “Bong” Go na patuloy na ipaglalaban ang lalo pang pagpapabuti ng serbisyo sa pangangalagang pangkalusugan sa buong bansa.

Si Go ay kasama ni Pangulong Rodrigo Duterte sa inagurasyon ng bagong Dr. Jose Fabella Memorial Hospital noong Miyerkules sa Lungsod ng Maynila.

Ang Dr. Jose Fabella Memorial Hospital na itinatag noong 1920, ay isang national specialty hospital para sa obstetrics, gynecology at pediatric cases. Nagsimula ito bilang isang ten-bed maternity clinic sa Sampaloc, Maynila hanggang 1950 nang lumipat ito sa kasalukuyang lokasyon nito sa Lope De Vega St., Manila.

Ang bagong ospital ay ilalagay sa Department of Health Complex na kinaroroonan din ng Dr. Jose Reyes Memorial Medical Center at San Lazaro Medical Center. Sa kabuuang floor area na 43,287 square meters at anim na palapag, ang bed capacity ng ospital ay itinaas din mula 700 hanggang 800. Kasama sa proyekto ang pagbili ng mga bagong kagamitan at pagkuha ng karagdagang staff ng ospital.

Nagkakahalaga ang proyekto ng tinatayang P2 bilyon, kabilang na ang gastos sa imprastraktura at pagkuha ng mga kagamitang medikal. Pinondohan ito ng Health Facilities Enhancement Program ng DOH at kita na nabuo ng ospital.

Ayon kay Go, ang pagpapabuti sa pangangalagang pangkalusugan sa pamamagitan ng pag-upgrade sa kasalukuyan at paglikha ng mga bagong ospital ay kritikal, partikular sa mga lokasyon na ang pasilidad ay lubhang kailangan upang matugunan ang mga pangangailangan ng mga mamamayang Pilipino.

“Ako po sa Senado, patuloy kong ipaglalaban ang pagdadagdag ng bed capacities at pagtatatag ng mga bagong pampublikong ospital,” ani Go.

“Naintindihan ko na mahalaga talaga ang pagtatatag ng mga bagong ospital dahil may mga lugar talaga na malayo. Dapat tayong magpatuloy sa pamumuhunan sa ating sistema ng pangangalagang pangkalusugan. Ako bilang inyong committee chair (on Health) sa Senado, patuloy ko po itong ipaglalaban,” dagdag niya.

Ang Phase 1 ng proyekto ay 99.95 porsiyentong kumpleto na noong Abril 29, habang ang Phase 2 ay 93.19 porsiyentong kumpleto dahil sa natitirang gawaing arkitektura. Inaasahang matatapos ito sa Setyembre ng taong ito.

Inaasahang lalawak din sa bagong Dr. Jose Fabella Memorial Hospital ang kapasidad nito upang matugunan ang lumalaking pangangailangan para sa mga serbisyo ng ina at pediatric mula sa mga pasyente sa buong bansa, magbigay ng moderno at ligtas na mga pasilidad sa pangangalagang pangkalusugan para sa mga ina, bagong panganak na sanggol, at mga pasyenteng pediatric, gayundin ang itatag ang sarili bilang isang nangungunang sentro ng pananaliksik at pagsasanay para sa Reproductive Health at Advanced Neonatal Health.

Si Go na pangunahing tagapagtaguyod para sa pagpapabuti ng sistema ng pangangalagang pangkalusugan at mga serbisyo sa bansa, ay nagsusulong din ng ilang iba pang panukalang pambatas tungkol sa kalusugan ng publiko. Sa pamumuno ni Go, nauna nang itinaguyod at pinadali ng Senate Committee on Health ang pagpasa ng 39 batas sa pag-upgrade sa bagong pampublikong ospital sa buong bansa.

Ang Malasakit Centers Act ay pangunahing isinulat at itinaguyod ni Go at nilagdaan bilang batas noong Disyembre 2019. Nagtatag ito ng one-stop shop sa lahat ng ospital na pinamamahalaan ng DOH, kung saan ang mga mahihirap na pasyente ay madaling makatanggap ng tulong medikal mula sa gobyerno. Sa ngayon, mayroon nang 151 Malasakit Centers na nakatulong sa mahigit tatlong milyong Pilipino at ganap na gumagana sa iba’t ibang bahagi ng bansa.