6-day gun ban sa Metro Manila sinimulan na

MAGPAPATUPAD ng ‘gun ban’ ang Philippine National Police (PNP) sa National Capital Region (NCR) bilang isa sa paghihigpit sa seguridad sa paghahanda sa inagurasyon ni President-elect Ferdinand ‘Bongbong’ Marcos Jr.

Sa abiso ng Manila Police District (MPD), suspendido ang ‘permit to carry firearms outside residence’ (PTCFOR) sa NCR para sa nasabing aktibidad.

Magsisimula ang suspension mula alas-12:01 ng umaga ng June 27 hanggang 12:00 ng hatinggabi ng July 2, 2022.

Ayon sa MPD, paiiralin ng kapulisan ang kaayusan sa araw ng panunumpa ng bagong presidente upang ang lahat ng dadalo ay maging ligtas at maayos na maisagawa ang makasaysayang inagurasyon. (Jocelyn Domenden)