Paggamit sa preso sa drug ops iniimbestigahan ng PNP

MARIING iginiit ni PNP Chief Gen. Guillermo Eleazar na hindi nila polisiya ang magpakawala ng mga bilanggo para gamitin sa anti-illegal drug operations.

Sinabi ito ni Eleazar kasunod ng alegasyon ni Sen. Risa Hontiveros na naging kalakaran na umano sa PNP ang pagpapalaya sa mga bilanggo bilang shortcut umano sa ginagawa nilang imbestigasyon.

Pahayag ni Eleazar, maaari lamang kumuha ng impormasyon ang PNP mula sa isang drug detainee kung mayroong utos dito ang korte depende sa kung gaano ito ka-sensitibo at kahalaga sa operasyon.

Matatandaang ibinunyag ni Hontiveros sa naging pagdinig ng Senado ang testimoniya ng isang Jonaire Decena alias Mama Jo na ginamit umano siyang impormante ng mga Pulis nang magkasa ito ng operasyon kung saan, nakasabay nito ang mga tauhan ng PDEA na nagresulta naman sa madugong misencounter.

Dahil dito, ipinag-utos na ni Eleazar sa Internal Affairs Service (IAS) ang pagkakasa ng imbestigasyon upang alamin kung anu-anong paglabag ng mga Pulis sa kanilang protocol at mga polisiya. (Mark Obleada)