EUA para sa booster shots ng COVID-19 vaccine kailangan din – DOH

SINABI ng Department of Health (DOH) na kailangan pa rin ng mga vaccine manufacturers na kumuha ng emergency use authorization (EUA) mula sa Food and Drug Administration (FDA) para sa booster shot o ikatlong dose ng COVID-19 vaccine, para sa mga indibidwal na nakakumpleto na ng dalawang dose ng bakuna.

Ipinaliwanag ni Health Undersecretary Myrna Cabotaje, na siya ring head ng National Vaccination Operations Center (NVOC), ang inaplayan ng EUA ng mga kumpanyang gumagawa ng COVID-19 vaccine ay para sa pagtuturok ng dalawang doses lamang.

Dahil dito, kailangan pa umano nilang mag-aplay muli ng panibagong EUA para sa booster shots upang mapatunayan na ang pagbibigay ng ikatlong shots ng bakuna ay ligtas at mas lamang ang benepisyong dulot nito kumpara sa panganib.

“Kailangan ng emergency use authorization from FDA for a booster shot kasi ‘yung inaplayan ng companies ngayon ay two doses lang ‘yan so if you are going to give a booster, dapat mag-apply din sila na pwedeng pang-booster ‘yung kanilang current vaccine na supply sa atin,” ayon pa kay Cabotaje, sa panayam sa radyo at telebisyon.

Sinabi ni Cabotaje na sa sandaling mayroon ng EUA para sa booster shots, ay maaari na ring magbigay ang gobyerno ng ikatlong dose ng bakuna ngunit ipaprayoridad umano nila ang mga senior citizens, healthcare workers, at yaong mga indibidwal na immunocompromised o may karamdaman.

Samantala, pinag-aaralan na umano ng pamahalaan kung ang third dose ng bakuna na ibibigay sa mga mamamayan ay dapat bang kaparehong brand gaya ng primary doses na naiturok sa kanila, o di kaya ay ibang brand naman.

Klinaro rin naman ni Cabotaje na ang booster doses ay ipagkakaloob nila sa mga taong ang immunity ay nabawasan na, ilang buwan matapos silang mabigyan ng primary doses habang ang third shot naman ng bakuna ay ipagkakaloob para sa mga indibidwal na hindi sapat ang nakuhang immunity laban sa COVID-19, gaya ng senior citizens, healthcare workers, at yaong mga immunocompromised. (ANDI GARCIA)