Sundalo, nagpaputok ng baril sa sibilyan

NAGA CITY – Pinaputukan at tinutukan ng baril ng sundalo ang isang sibilyan na nakasuot ng camouflage pants sa San Antonio Poblacion, Calabanga, Camarines Sur.

Napag-alaman na napikon ang suspek na si PFC Jayson Azañes, 31-anyos, aktibong miyembro ng Philippine Army at nakadestino sa 25IB, 10th Infantry Division, Davao De Oro, residente ng Barangay Camuning, sa nasabing bayan.

Sa report, nakita nito ang dalawang indibidwal at ang isa nakasuot ng camouflage pants sa loob ng isang karinderya.

Kinompronta ni Azañes ang lalaki at tinanong kung miyembro ito ng tropa ng pamahalaan nguni’t hindi ito naniwala sa naging sagot ng biktima.

Dahil dito, kinuha at pinaputok ni Azañes ang dala-dala nitong caliber .45 na baril at pilit na pinahuhubad sa biktima ang nasabing pantalon.