EO na proteksyon sa refugee, stateless person, asylum seeker pinuri ni Bong Go

PINURI ni Senator Christopher “Bong” Go si Pangulong Rodrigo Duterte sa pagpapalabas ng Executive Order No. 163 na magbibigay proteksyon sa mga refugee, mga taong walang estado at mga humihingi ng asylum.

Ang EO na inilabas nitong Marso 2 ay nag-atas sa estado na mahigpit na subaybayan at tiyakin ang ganap na proteksyon ng mga karapatan ng mga persons of concern (POC) sa kalayaan at seguridad, at kalayaan sa paggalaw.

“Isa po sa mga ipinagmamalaking katangian ng mga Pilipino ang ating malasakit sa kapwa tao, kababayan man natin ito o hindi. Kaya naman po kinokomendahan ko si Pangulong Duterte at ang gobyerno sa napakagandang polisiyang ito na nagpapakita sa ating pagiging likas na matulungin,” sabi ni Go.

Sinabi ni Go na sadyang malapit ang puso ng Pangulo sa mga inaabuso o inaapi at hindi niya maatim na hindi sila tulungan.

Alinsunod sa 1951 United Nation Convention Relating to the Status of Refugees o sa 1967 Protocol, 1954 UN Convention Relating to the Status of Stateless Person, at 1961 Convention on the Reduction of Statelessness, ang EO ay nagbibigay ng pinakamababang pamantayan para sa pagtrato sa mga POC.

Kabilang dito ang pagbibigay ng access sa mga serbisyong sosyo-ekonomiko, mga benepisyo sa social security, kapaki-pakinabang na trabaho, makataong kondisyon sa pagtatrabaho, edukasyon, paglahok sa judicial at administrative citizenship proceedings, legal na tulong, pag-access sa mga korte at kalayaan sa relihiyon.

Ngunit ang mga POC ay may kasabay na obligasyon na sumunod sa mga batas at regulasyon ng bansa, kabilang ang mga hakbang na may kaugnayan sa proteksyon ng pampublikong kalusugan, pagpapanatili ng kaayusan ng publiko at pambansang seguridad.

Lumilikha din ang EO ng Inter-Agency Committee on the Protection of Refugees, Stateless Persons at Asylum Seekers na nakatalaga sa sentral na tungkuling tiyakin ang pagkakaloob ng mga nauugnay na serbisyo at tulong sa mga POC.

Ang mga LGU ay inatasan din na tiyakin ang maayos na pagsasama sa mga POC sa kanilang mga komunidad. Hinihikayat din silang gawing available ang mga kinakailangang programa at serbisyo at magsagawa ng mga kampanya para sa kaalaman sa impormasyon.

“Gamitin din po natin ang pagkakataong ito upang ipakita ang katangi-tangi at ipinagmamalaki nating Filipino hospitality na kilala sa buong mundo.”

“Patunayan natin na hindi lang maganda ang ating bansa kundi matulungin din at mapagmalasakit ang mga mamamayan nito,” ayon kay Go.

Ayon sa website ng UN High Commissioner for Refugees, ang Pilipinas ay may mahabang kasaysayan ng pagtanggap sa mga refugee, mula pa noong naging State Party ito sa 1951 UN Convention.

Noong 2019, ipinahayag ni Duterte ang kanyang pagpayag na tulungan ang mga Rohingya refugee na tumatakas sa pag-uusig sa Myanmar. Nag-alok din siya ng tulong sa mga Afghan refugee noong nakaraang taon.