P9-trillion infrastructure projects aprub na ni PBBM

INAPRUBAHAN nitong Huwebes ng National Economic and Development Authority (NEDA) Board, sa pamumuno ni Pangulong Ferdinand “Bongbong” Marcos Jr., ang P9 trilyong halaga ng infrastructure flagship projects (IFPs), kabilang ang mga pinasimulan ng mga nakaraang administrasyon.

Sinabi ni NEDA Secretary Arsenio Balisacan na ang Board ay nagbigay ng go-ahead para sa 194 IFPs, karamihan sa mga ito ay may kinalaman sa physical connectivity at water resources, kabilang ang mga proyekto sa irigasyon, supply ng tubig, at pamamahala sa baha.

Sinabi ni Balisacan na 71 sa mga proyekto ay mula sa mga nakaraang administrasyon, kabilang ang patuloy na Mega Manila Subway Project na inaprubahan sa ilalim ni dating Pangulong Rodrigo Duterte at ang North-South Commuter Railway, na inakala na maging pinakamalaking railway project sa ilalim ng yumaong dating Pangulong Benigno “Noynoy” Aquino III.

Sinabi ng kalihim na 123 sa mga proyekto sa listahan ay “bago,” kabilang ang rehabilitasyon ng Ninoy Aquino International Airport (NAIA), na may dalawang hindi hinihinging panukala mula sa NAIA Consortium at Megawide Consortium na tinanggihan noong termino ni dating Pangulong Rodrigo Duterte.

Kasama rin sa mga bagong proyekto ang Mindanao Railway Project III, ang North Long Haul Railway, ang San Mateo Railway, ang UP-PGH Diliman Project, ang Ilocos Sur Transbasin Project, at ang Metro Cebu Expressway.

May 45 sa mga IFP ang inaasahang tutustusan sa pamamagitan ng pakikipagtulungan sa pribadong sektor, isang pagbabago mula sa kagustuhan ng administrasyong Duterte para sa Official Development Assistance (ODA) scheme. (Vanz Fernandez)