Mag-ina napatay ng singer-vlogger

INIIMBESTIGAHAN ng mga awtoridad ang isang singer-vlogger sa Iloilo sa umano’y pagkakasangkot nito sa malagim na aksidente na kumitil sa buhay ng 20-anyos na babae at kanyang dalawang buwan-gulang na sanggol sa Barangay Bitoon Ilaya, Cuartero, Capiz, Linggo ng hapon.

Kinilala ang suspek na si alyas “Clyde”, 24 anyos, vlogger, residente ng Molo, Iloilo City at tubong President Roxas, Capiz; at ang driver ng Toyota Hiace van na si alyas “Ben”, 46, taga-Barangay Mongpong, Roxas City.

Ayon kay Cuartero Chief, Capt. Alladen Talaban, nangyari ang aksidente nang tangkain ni Clyde na sakay ng Toyota Raize na i-overtake ang isang sasakyan sa slow lane ng national highway 2:30 ng hapon.

Sa report, sumalpok si Clyde sa isang tricycle kungsaan lulan ang mga biktima na kinilalang sina alyas “Ivy” at Baby “Cha” na patungo sana sa isang ospital sa bayan ng Dao upang bisitahin ang isa pa niyang anak.

Tumilapon ang mga biktima mula sa tricycle papunta sa kabilang linya at nasagasaan naman ng van na minamaneho ni Ben, na agad sumuko sa mga awtoridad.

Sinampahan ng kasong ‘reckless imprudence resulting in multiple homicide and damage to property’ ang vlogger at ang driver ng van.