Advertisers

Advertisers

‘THRILLA IN MANILA’ ANNIV EVENTS SUPORTADO NI PANGULONG MARCOS

0 50

Advertisers

LIMANG dekada na mula nang ganapin sa Araneta Coliseum ang tinaguriang “Thrilla in Manila,” ang labang tumatak sa kasaysayan ng boksing sa buong mundo.

Ang sagupaan nina Muhammad Ali at Joe Frazier noong 1975 ay hindi lamang laban ng dalawang alamat ng boksing, kundi isang pangyayaring nagbigay ng napakalaking karangalan at atensyon sa Pilipinas.

Kaya naman makabuluhan na ipagdiwang natin ang ika-50 anibersaryo nito ngayong Oktubre.

Ang magandang balita, mismong si People’s Champ Manny Pacquiao ang nangunguna sa pagsasakatuparan ng selebrasyong ito.

Hindi lamang ito simpleng pagbabalik-tanaw sa nakaraan, kundi isang proyektong naglalayong itampok ang galing ng mga Pilipino at bigyan ng inspirasyon ang susunod na henerasyon ng mga atleta.

Malaking bagay ang naging pakikipagpulong ni Pacquiao kay Pangulong Ferdinand Marcos Jr. sa Malacañang.

Dito’y ipinakita ng Pangulo ang kanyang “all-out support” para maging matagumpay ang selebrasyon.

Isa itong patunay na kapag nagkaisa ang pamahalaan at pribadong sektor, lalo pang napapaganda ang mga proyektong nakalaan hindi lamang para sa kasaysayan, kundi para sa sambayanan.

Sa ganitong paraan, naipapakita rin ng pamahalaan ang pagpapahalaga nito sa sports bilang bahagi ng ating kultura at pagkakakilanlan.

Mahalaga ang mensaheng dala ng ‘Thrilla in Manila’.

Aba’y ipinapaalala nito na ang Pilipinas ay may kakayahang maging sentro ng pandaigdigang atensyon sa larangan ng sports.

Ngayon, sa ika-50 taon, pagkakataon na naman ito para ipakita ang ating husay—hindi lamang sa pag-organisa ng mga kaganapan, kundi pati na rin sa pagpapalakas ng sports development sa bansa.

Ang posibilidad na magkaroon ng mga world title fights sa selebrasyon ay dagdag na atraksyon na siguradong makakaakit ng atensyon mula sa buong mundo.

Hindi rin dapat kaligtaan ang papel ng mga kabataan.

Sa pamamagitan ng pagdiriwang na ito, maipapakita sa kanila ang halaga ng sipag, tiyaga, at disiplina.

Kung paanong sina Ali at Frazier ay nagsilbing huwaran ng katatagan sa ibabaw ng ring, at kung paanong si Pacquiao ay naging simbolo ng determinasyon at tagumpay ng isang Pilipino, maaari rin silang maging inspirasyon ng bagong henerasyon ng mga manlalaro.

Ang ‘Thrilla in Manila’ ay hindi lamang pag-alala sa isang laban.

Isa itong makulay na selebrasyon ng ating kasaysayan, pagkakaisa, at pagmamahal sa boksing.

At sa suporta ng pamahalaang Marcos, mga atleta, at sambayanan, tiyak na magiging matagumpay ang ika-50 anibersaryo nito.

Tulad ng laban noong 1975, mananatili itong bahagi ng ating pambansang alaala at simbolo ng ating kakayahan na ipagmalaki ang Pilipinas sa buong mundo.

***

Catch Gilbert Perdez’s “Barangay 882” radio show every Saturday from 4:00 PM to 5:00 PM. Tune in via ALIW Channel 23, DWIZ AM Radio, DWIZ 882 Facebook page, or DWIZ ON-DEMAND on YouTube. You can contact him via email at gil.playwright@gmail.com or through this number: 0991-3543676.