EX-PCSO CHIEF ROYINA GARMA BUMALIK SA PH PAGKATAPOS NG 10-MONTH DETENTION SA US

KINUMPIRMA ng Bureau of Immigration ang pagdating ng retiradong pulis na si Col. Royina Garma sa Ninoy Aquino International Airport Terminal 1 noong Sabado,Setyembre 06,2025.

Ayon sa ilang Immigration personnel, lumipad si Garma sa isang flight ng Philippine Airlines mula Los Angeles sa California.

Nag-aplay si Garma ng asylum sa US para pigilan ang kanyang pagbabalik sa Pilipinas, kung saan nahaharap siya sa mga kasong kriminal para sa pagpatay kay Philippine Charity Sweepstakes Office (PCSO) board secretary Wesley Barayuga noong 2020.

Ang mga ulat ay nagsabi na ang aplikasyon ay tinanggihan at si Garma ay naaresto sa US dahil sa isang nakanselang visa.

Ang mga naunang ulat ay nagsabi na si Garma at dating National Police Commission commissioner Edilberto Leonardo ay nag-utos umano sa pagpatay kay Barayuga upang pigilan ito sa pagsisiwalat ng katiwalian sa PCSO, kung saan siya ay nagsilbi bilang general manager.

Si Barayuga ay tinambangan ilang sandali matapos siyang umalis sa PCSO central office sa Mandaluyong noong Hulyo 30, 2020. Ang kanyang driver ay nasugatan ngunit nakaligtas sa pag-atake.

Bukod kay Garma, pinangalanang respondents din sa reklamo sina retired police colonel Edilberto Dela Cruz Leonardo, Police Lt. Col. Santie Fuentes Mendoza, PSMS Jeremy Zapata Causapin, Nelson Enriquez Mariano, at isang alyas na “Loloy.”

Inihain ng National Bureau of Investigation-Organized and Transnational Crime Division (NBI-AOTCD) at Philippine National Police-Criminal Investigation and Detection Group (PNP-CIDG) ang reklamo kasunod ng imbestigasyon sa mga isiniwalat sa quad committee hearings noong nakaraang taon ng House of Representatives.

Tumestigo si Garma sa quad committee ng House of Representatives hinggil sa operasyon ng ilegal na droga noong panahon ni dating pangulong Rodrigo Duterte.

Dati siyang ikinulong ng quad com matapos ma- cited in contempt ngunit kalaunan ay pinalaya. Pagkatapos ay tumakas siya sa Estados Unidos. (JOJO SADIWA)