Alok ni PBBM na P1-B kapalit ng pagtakbo ni Bello sa Davao, ‘di totoo — Malakanyang

PINABULAANAN ng Malakanyang nitong Biyernes ang alegasyon ni dating Manila Economic and Cultural Office (MECO) chief Silvestre Bello III na sinibak siya dahil tinanggihan niya ang umano’y alok ni Pangulong Ferdinand R. Marcos Jr. na tumakbo siya para sa pagka-kongresista sa Davao City.

“Nakipag-usap ako sa Pangulo nang personal tungkol sa bagay na ito, at sinabi niya na ito ay isang kasinungalingan,” sinabi ni Palace Press Officer Claire Castro sa isang press briefing, nang hilingan na magkomento sa paratang ni Bello.

Sa pagsasalita sa People’s Congress na inorganisa ng oposisyong Partido Demokratiko Pilipino Lakas ng Bayan (PDP-Laban) sa Quezon City noong Martes, inakusahan ni Bello si Marcos na nag-alok ng PHP1 bilyon kapalit ng kanyang kasunduan na tumakbo laban kay Rep. Isidro Ungab.

Sinabi ni Bello na inalis siya sa MECO dahil tinanggihan niya ang dapat na kahilingan.

Nang tanungin kung ano ang rason sa pagkakatanggal ni Bello sabi ni Castro: “Pwede mo siyang tanungin, pero on the part of the President, it’s a lie. There’s no truth about that.”

Bumaba si Bello bilang MECO chief noong Setyembre 2024 pagkatapos ng dalawang taong panunungkulan at pinalitan ni dating Presidential Communications Office Secretary Cheloy Garafil. (Vanz Fernandez)