General Torre nagretiro na

OPISYAL nang nagretiro sa serbisyo ng Philippine National Police (PNP) si General Nicolas Torre III, matapos aprubahan ng National Police Commission (Napolcom) ang kanyang retirement, ayon sa General Order No. NHQ-GO-OR-2026-330 na inilabas ng PNP Directorate for Personnel and Records Management noong Jan. 19.
Ayon sa kautusan, “optionally retired” si Torre mula sa PNP epektibo December 26, 2025, at makatatanggap ng fifth longevity pay at retirement benefits na katumbas ng kanyang ranggo, alinsunod sa Napolcom Resolution No. 2026-0029 na inilabas Jan. 19.
Binanggit sa kautusan ang Section 40 ng Republic Act No. 6975 o DILG Act, kaugnay ng Section 34 ng RA No. 8551 o PNP Reform and Reorganization Act.
Dahil sa pagretiro ni Torre, itataas sa 4-star rank na Police General si acting PNP Chief Lt. Gen. Jose Melencio Nartatez Jr., ang ranggong karaniwang hawak ng isang ganap na hepe ng PNP.
Inalis si Torre sa puwesto Aug. 26, 2025 dahil sa alitan sa Napolcom ukol sa kanyang reassignment ng ilang senior PNP officials.
Inilipat siya sa Personnel Holding and Accounting Unit ng PNP DPRM habang naghihintay ng bagong assignment, at naging General Manager ng Metropolitan Manila Development Authority (MMDA) noong Dec. 26.
Sinabi ng Napolcom na sa pagtanggap ni Torre sa MMDA post, siya ay “ipso facto” nang nagbitiw sa puwesto sa PNP.(Boy Celario/Mark Obleada)