Buy bust nauwi sa habulan: suspek todas

NAUWI sa high-speed car chase na nagtapos sa pagkamatay ng suspek ang isang buy-bust operation sa Bacoor City, Cavite malapit sa Kawit exit ng Manila-Cavite Expressway (CAVITEX), noong Martes.
Ninakaw ng suspek ang isang unmarked AUV ng pulisya habang isinasagawa ang operasyon at binangga ang mobile car ng Bacoor Police habang paulit-ulit na nagpaputok sa mga pulis.
“Tina-try na ipatabi pero ayaw daw po tumabi, instead pumutok po (raw) sa kanila,” ani Lt. Col. Alexie Desamito, hepe ng Bacoor police.
Sa habulan, nabangga ng AUV ng suspek ang dalawang motorsiklo, isang traysikel, at isang SUV. Agad na nabigyan ng first aid ang mga biktima.

Natapos ang habulan nang barilin ng pulisya ang mga gulong ng AUV.
Ani Desamito, “Ayaw po niyang buksan ‘yung pintuan, so binasag na po ‘yung salamin sa likod. Tapos while ginagawa ‘yun, bumaril na po. So no choice na po ‘yung tropa kundi makipag-sabayan narin po.”
Namatay ang suspek sa engkwentro, na nagdulot ng mabigat na trapiko sa lugar.