ICC ARREST WARRANT BITBIT NI TRILLANES, INABANGAN SI BATO PARA ARESTUHIN SA SENADO

NINAIS ni dating Senador Antonio “Sonny” Trillanes IV na masaksihan ang pagsisilbi kay Sen. Ronald “Bato” dela Rosa ng sinasabing warrant of arrest mula sa International Criminal Court (ICC).

Nitong Lunes, sumama si Trillanes sa mga ahente ng NBI na nagbitbit ng warrant of arrest sa Senado.

“Personal request ni Bato samahan ko daw ‘pag aarestuhin siya. That’s why I’m here, andito yung NBI aarestuhin siya,” diin ni Trillanes.

Ipinakita pa ni Trillanes ang kopya ng warrant of arrest laban kay dela Rosa.

“Hinamon niya ako, nandito ako. I showed up, samahan ko ‘yung mag-aresto sa kanya,” ayon pa kay Trillanes.

Samantala, nahalal pa si dela Rosa na muling pamunuan ang Senate Public Order and Dangerous Drugs Committee matapos ang pagpapalit ng liderato ng Senado.

Kasunod nito, inanunsyo ni bagong Senate President Alan Peter Cayetano na sa kasaysayan ay walang naarestong senador sa loob ng gusali ng Senado.

“Just for the record, no senator was allowed to be arrested ever inside the Senate premises,” ani Cayetano.