SHARLENE VIRAL ‘PAGMUMURA’ SA MGA OPISYAL NG GOBYERNO

By Beth Gelena

Nag-viral ang gamer at aktres na si Sharlene San Pedro matapos niyang ilabas ang kanyang pagkadismaya sa planong dagdag-singil para sa mga international traveler.

Sa isang video na kumalat sa social media, kinuwestiyon ni Sharlene kung bakit kailangan pang magdagdag ng panibagong bayarin gayong nagbabayad na rin naman ang mga biyahero ng travel tax. Ayon sa kanya, marami nang buwis na pinapasan ng mga Pilipino ngunit marami pa ring serbisyo ng gobyerno ang kinakailangang mapabuti.

Ipinahayag din niya ang kanyang pagkairita sa patuloy na pagtaas ng mga gastusin at hinimok ang publiko na maging mapanuri sa mga kandidatong ibinoboto tuwing halalan. Nanawagan siya sa mga netizen na suriin hindi lamang ang mga pangako ng mga politiko kundi pati na rin ang epekto ng mga polisiya sa pang-araw-araw na buhay ng mga mamamayan.

Bukod sa usapin ng travel fees, nabanggit din ni Sharlene ang kanyang pagkadismaya sa mga panukalang buwis na maaaring makaapekto sa digital services at gaming purchases, kabilang ang paborito niyang larong Call of Duty: Mobile.

Dahil sa kanyang prangkang pahayag, umani ng magkakahalong reaksiyon ang aktres online. May mga sumang-ayon sa kanyang hinaing tungkol sa buwis at serbisyo ng gobyerno, habang may ilan namang nagsabing mahalagang maunawaan muna ang layunin at detalye ng mga panukalang bayarin bago magbigay ng matinding reaksiyon.

Sa kasalukuyan, nananatiling usapin sa publiko ang balanse sa pagitan ng pangongolekta ng buwis para sa mga proyekto ng pamahalaan at ang pangangailangang tiyaking may sapat na benepisyo at maayos na serbisyo kapalit nito.

Narito ang mga prangkang salita ni Sharlene sa kanyang socmed.

“Ano ‘to? Bakit magcha-charge na ang Immigration ng 480 pesos per passenger? Eh ‘di ba nagbabayad naman ng travel tax ‘pag aalis?” nagtatakang sabi ni Sharlene sa isang video clip na shinare sa X.

“Ang dami mong pinapabayaran sa’min, hindi naman maayos ang gobyerno! Letse!”

“‘Di bale sana kung maayos, eh magbabayad talaga! Nakakairita!”

Natuon tuloy ang kanyang pagwawala sa mga nakaupo ngayon sa pamahalaan gaya ng mga senador, congressman, mayor at governor.

“Bumoto kayo nang maayos sa susunod na eleksyon, sinasabi ko sa inyo,”

“Pumapayag kayo sa isang kilong bigas? Tuwing eleksyon lang kayo maaalala ng mga ‘yan! Real talk lang,”

Ang ikinainis pa niya na maging ang nagpapasaya sa kanya na laro na Call of Duty: Mobile (CODM) ay balak lagyan ng buwis ng gobyerno.

“Pati dito sa CODM lalagyan na ng tax ‘yung cp. Punyemas na buhay ‘to!”

O di ba, ang tapang ni Sharlene na ipahayag ang kanyang saloobin tungkol sa gobyerno na halos naman ay tama.