Estudyante tinamad pumasok, nag-post pasasabugin ang iskul

DINAKIP ang isang 18-anyos na estudyante matapos mag-post ng bomb threat laban sa kaniyang paaralan sa Llanera, Nueva Ecija upang masuspinde ang klase.
Nagpadala ang mga awtoridad ng Explosive Ordnance Disposal unit ng Philippine National Police upang inspeksyunin ang paaralan matapos i-post ng estudyante ang banta noong Hulyo 27, 2026.
Walang natagpuang pampasabog matapos ang ilang oras na inspeksyon, ngunit nagdulot ang post ng takot sa mga guro, estudyante, at magulang.
Ayon kay Llanera Police chief Captain Edmer Portilio, nakasaad sa Facebook post ng estudyante: “Hi, magpapasa-bog po ako sa school, sa school bukas. Ingat.”
Kalaunan ay natunton at inaresto ng pulisya ang estudyante. Kinumpiska rin ang kaniyang cellphone na sasailalim sa cybercrime forensic examination.
Inamin ng estudyante na siya ang gumawa ng post at sinabing nais lamang niyang masuspinde ang klase.
“Para lang pong walang pasok po sa nasabing paaralan. ‘Yun po ang sinabi niya sa akin. Base po sa pag-iimbestiga namin, ‘yun lang po ‘yung naging alibi niya,” ani Portilio.
Inamin din ng estudyante ang kaniyang pagkakamali at itinangging may intensyon o kaalaman siyang magsagawa ng pagpapasabog.
Nahaharap ang estudyante sa mga reklamong paglabag sa Anti-Bomb Joke Law at Cybercrime Prevention Act of 2012.