NTF-ELCAC Executive Director, Inilatag ang Direksyon Tungo sa Pangmatagalang Kapayapaan at Sustenable na Kaunlaran

Inilatag ng bagong talagang Executive Director ng National Task Force to End Local Communist Armed Conflict (NTF-ELCAC) na si Undersecretary Danilo Pamonag ang malinaw na direksyon para sa susunod na yugto ng kampanya ng pamahalaan para sa kapayapaan at kaunlaran: isang Pilipinas kung saan wala nang batang Pilipino ang kailanman lalaki sa anino ng armadong tunggalian.

Sa pormal niyang pag-upo bilang pinuno ng NTF-ELCAC, nanawagan si Pamonag sa mga ahensya ng pamahalaan, lokal na punong ehekutibo, mga pwersang panseguridad, civil society, at mga lokal na komunidad na sama-samang sumulong tungo sa iisang layunin.

Para kay Pamonag, ang pangmatagalang kapayapaan ay hindi lamang nangangahulugan ng kawalan ng armadong engkwentro.

Binigyang-diin niya na ang tunay na tagumpay ay dapat masukat sa pang-araw-araw na buhay ng karaniwang Pilipino—isang batang nakapapasok sa paaralan nang walang takot, isang pamilyang mapayapang naghahanapbuhay, at isang liblib na barangay na ganap na naaabot ng mga serbisyo ng pamahalaan.

“Abot-tanaw na natin ang finish line, ngunit ang mga huling hakbang ay nangangailangan ng pinakamataas na antas ng ating malasakit, integridad, at pagsusumikap,” ani Pamonag. “Kailangan nating manatiling maagap at mabilis tumugon sa paglilingkod sa mamamayan upang wala nang batang Pilipino ang kailanman lalaki sa anino ng armadong tunggalian.”

Binigyang-diin niya na makakamit lamang ang tunay na kapayapaan kapag ang isang bata sa liblib na barangay sa kabundukan ay may kapantay na pagkakataong makamit ang edukasyon, imprastraktura, at kabuhayan na tinatamasa ng mga batang nasa mga sentrong urban.

Iniangkla ni Pamonag ang kanyang roadmap sa tatlong pangunahing haligi—Pagkakaisa, Kapayapaan, at Kaunlaran—habang inilalatag ang mahahalagang prayoridad ng Task Force:

• Pagpapatibay sa Whole-of-Nation Approach: Palalimin ang koordinasyon sa pagitan ng mga pambansang ahensya at local government units (LGUs).

• Pag-aalis ng mga Hadlang sa Pagitan ng mga Institusyon: Isulong ang isang nagkakaisa at result-oriented na burukrasya upang mapabilis ang pagtutulungan at convergence ng mga ahensya.

• Pagpapanatili ng Presensya sa mga Komunidad: Tiyaking nananatiling aktibo at mabilis tumugon ang Joint Regional Task Forces at National Clusters sa mga lugar na matagal nang nakaranas ng pagkakahiwalay o bulnerable sa armadong tunggalian.

• Pagtitiyak ng Pangmatagalang Kaunlaran: Gawing permanente at tuluy-tuloy ang mga kalsada, paaralan, serbisyong pangkalusugan, at oportunidad sa kabuhayan sa mga nalinis nang komunidad upang maiwasan ang muling pag-usbong ng karahasan.

“Magkaisa po tayo. Gawin nating masiglang sentro ng oportunidad at pag-asa ang mga dating lugar ng tunggalian. Sama-sama nating tahakin ang landas na ito,” dagdag ni Pamonag.

Nagbigay-pugay din si Pamonag sa kanyang sinundan na si Undersecretary Ernesto C. Torres Jr., at kinilala ang kanyang estratehikong pananaw na nakatulong sa pagpapahina ng armadong insurhensiya, pagpapalakas sa papel ng mga lokal na punong ehekutibo, at paggabay sa kampanya tungo sa mabuting pamamahala.

“Usec. Torres, maraming salamat sa iyong tapat na paglilingkod sa bayan. Nag-iwan ka ng matibay na pundasyon na patuloy nating pagtatayuan at palalakasin,” pahayag ni Pamonag.

Habang patuloy na humihina ang insurhensiya, hinikayat ni Pamonag ang NTF-ELCAC Secretariat, mga regional task force, at mga katuwang na ahensya na harapin ang huling yugto ng kampanya nang may higit na propesyonalismo at integridad. Aniya, ang tunay at sukdulang tagumpay ay ang pagkakaroon ng isang henerasyon ng mga batang Pilipino na hindi na kailanman makararanas ng pamumuhay sa gitna ng insurhensiya.

Buong suporta naman ang ipinahayag ni National Security Adviser at NTF-ELCAC Vice Chairperson Secretary Eduardo S.L. Oban Jr., na nangasiwa sa turnover ceremony, sa estratehikong direksyong inilatag ni Pamonag.

Hinamon ni Oban ang Task Force na tiyaking hindi na mababaligtad ang mga nakamit na tagumpay sa pamamagitan ng pag-institutionalize ng mga matagumpay na programang pangkapayapaan bilang bahagi ng regular na mekanismo ng pamahalaan. Pinuri rin niya ang pamumuno ni Usec. Torres sa pagbago ng pambansang estratehiya—mula sa dating pangunahing nakasentro sa seguridad tungo sa isang pamamaraang kumikilala sa kaunlaran bilang pangunahing puwersa sa pagkamit ng tunay at pangmatagalang kapayapaan.