Jokic triple-double sa panalo ng Nuggets vs 76ers

INUKIT ni Nikola Jokic ang kanyang ika-29 triple-double sa season matapos pangunahan opensa ng Nuggets sa 116-111 pagsipa sa Philadelphia 76ers.

Kumamada si Jokic ng 25 points, 17 rebounds at 12 assists para pamunuan ang Denver (51-24) na nakahugot kay Jamal Murray ng 19 markers.

Hindi naglaro sina Embiid (sore right calf) at James Harden (Achilles) para sa Philadelphia (49-26) na pinamunuan ni Tyrese Ma­xey sa kanyang 29 points.

Itinala ng Nuggets ang 22-point lead sa third period bago nakalapit ang 76ers sa 111-114 mula sa dunk ni Montrezl Harrell sa hu-ling 29 segundo ng fourth quarter.

Ang dalawang free throws ni Jeff Green sa na­titirang 13.3 segundo ang sumelyo sa panalo ng Denver.

Sa Sacramento, umiskor si Jaden McDaniels ng 20 points at diniskaril ng Minnesota Timberwolves (39-37) ang pagbulsa ng Kings (45-30) sa isang playoff berth nang itakas ang 119-115 panalo.

Sa Detroit, naghulog si Khris Middleton ng season-high na 34 points sa 126-117 demolisyon ng Milwaukee Bucks (54-21) sa Pistons (16-59).

Sa Salt Lake City, kumamada si Devin Booker ng 24 points sa 117-103 panalo ng Phoenix Suns (40-35) sa Utah Jazz (35-40).