Paglipat ng P89.9B pondo ng Philhealth sa National Treasury, pinigil ng SC

NAGLABAS ng temporary restraining order (TRO) ang Supreme Court (SC) upang pigilan ang paglilipat ng pondo ng Philippine Health Insurance Corporation o Philhealth papunta sa National Treasury.

Sinabi ng tagapagsalita ng SC na si Atty. Camille Sue Mae Ting, ang naturang TRO ay epektibo kaagad matapos na paboran ng korte ang prayers o kahilingan ng tatlong petitioner.

Kabilang sa mga petitioners ay ang 1Sambayan, Senator Aquilino “Koko” Pimentel, at Bayan Muna na humiling na harangin ang paglilipat ng Philhealth funds sa National Treasury.

Kung matatandaan, nailipat na ang aabot sa P20 billion na pondo noong May 10 at karagdagang P10 billion noong August 21, 2024.

Nailipat na rin ang ikatlong tranche ngayong buwan na nagkakahalaga ng aabot sa P30-bilyon.

Paliwanag pa ni Atty. Ting, hindi na maibabalik sa Philhealth ang pondo nito na una nang nailipat sa National Treasury dahil hindi na ito sakop ng TRO.

Una nang iginiit ng mga petitioner na ilegal at labag sa Saligang Batas ang paggamit ng P89.9 bilyong Philhealth fund para sa ibang government projects.