Babaeng piloto lasog sa bumagsak na kopter

NASAWI ang isang babaeng piloto nang mag-crash ang sinasakyang helicopter nito sa Purok Arimungmong, Barangay San Miguel, Guimba, Nueva Ecija, Sabado ng gabi.

Sa report, 10:00 ng umaga nang umalis ng Maynila patungong Baguio ang helicopter.
Alas-dose ng tanghali, nagbaba ito ng isang pasahero sa Baguio bago ito lumipad muli patungong Binalonan, Pangasinan upang mag-refuel.

Ayon sa mga opisyal ng Binalonan Airport, napansin na nilang nahihirapang mag-restart ang helicopter bago ito lumipad 4:30 ng hapon.

Bandang 7:00 ng gabi nang ma-detect ng Philippine Aeronautical Rescue Coordination Center (PARCC) ang anim na emergency transmitter locator alerts kungsaan nakumpirma na isang helicopter ang nag-crash sa Guimba.

Kasalukuyan nang nasa crash site ang Aircraft Accident Investigation and Inquiry Board ng Civil Aviation Authority of the Philippines (CAAP) upang alamin ang naging sanhi nang aksidente.