EX-LANDBANK MANAGER BINUKING P500M WITHDRAWALS NG OVP!

Tumestigo ang isang retiradong branch manager ng Land Bank of the Philippines (LandBank) nitong Miyerkules hinggil sa apat na cash withdrawal na nagkakahalaga ng kabuuang P500 milyon, na bahagi ng ebidensiyang iniharap ng House prosecution sa impeachment trial ni Vice President Sara Z. Duterte kaugnay ng umano’y maling paggamit ng P612.5 milyong confidential funds.

Kinilala ni Violeta Constantino, dating department manager ng LandBank Shaw Boulevard branch, ang apat na tsekeng nagkakahalaga ng P125 milyon bawat isa na iniharap ng prosekusyon. Ang lahat ng tseke ay nakapangalan kay Office of the Vice President (OVP) Special Disbursing Officer Gina F. Acosta.

Ayon kay Constantino, na nagsilbing branch manager mula Mayo 2017 hanggang sa kanyang pagreretiro noong Enero 2024, siya mismo ang nangasiwa sa pagproseso at pag-encash ng apat na tseke.

“Ang apat na tseke ay nakapangalan kay Ms. Gina F. Acosta na may halagang P125 milyon bawat isa,” pahayag ni Constantino sa direktang pagtatanong ni House prosecutor at Manila Rep. Joel Chua.

Sinabi rin niyang pamilyar siya sa mga transaksyon dahil personal niya itong binantayan habang siya ang branch manager ng Shaw Boulevard branch.

Ayon sa House prosecution, ang apat na tseke ay may petsang Disyembre 20, 2022; Enero 31, 2023; Abril 18, 2023; at Hulyo 13, 2023.

Ipinahayag ng prosekusyon na ang pondo para sa mga tseke ay nagmula sa National Treasury, inilipat sa account ng OVP, at kalaunan ay na-encash ni Acosta noong Disyembre 20, 2022; Pebrero 6, 2023; Abril 25, 2023; at Hulyo 14, 2023.

Kinilala rin ni Constantino si Queenie Masangkay bilang liaison ng OVP Cash Division na nakikipag-ugnayan sa kanya bago ang bawat encashment.

Ayon sa kanya, isa o dalawang araw bago ang bawat pag-withdraw ng P125 milyon, tumatawag si Masangkay upang ipaalam ang pangangailangan ng OVP sa malaking halaga ng cash.

Ipinaliwanag ni Constantino na kinakailangan ang advance notice dahil hindi karaniwang may nakahandang ganoong kalaking halaga ng pera ang sangay ng bangko.

“May cash-involved limit lang ang branch kaya wala kaming ganoong kalaking halaga anumang araw. Kailangan pa naming humiling ng karagdagang cash sa aming cash center,” ani Constantino.

Matapos matanggap ang abiso, sinabi niyang inuutusan niya ang branch cashier na makipag-ugnayan sa LandBank cash center upang maipadala ang kinakailangang halaga ng salapi.

Kapag naihatid na ang cash sa sangay, agad niyang tinatawagan si Masangkay upang ipaalam na maaari na itong kunin.

Ayon pa sa kanyang testimonya, sina Gina Acosta at Assistant Secretary at Assistant Chief of Staff Lemuel Ortonio, na awtorisadong lumagda para sa OVP, ang nagtutungo sa bangko upang i-encash ang mga tseke.

Iniharap ng House prosecution ang testimonya ni Constantino upang patunayan ang proseso ng pagproseso at pag-encash ng apat na tseke na may kabuuang halagang P500 milyon, bilang bahagi ng ebidensiya sa kasong impeachment laban kay Vice President Duterte kaugnay ng umano’y maling paggamit ng confidential funds.