Lanao del Norte host ng 1st Mindanao Youth Games sa 2027

MAGTATANGHAL ang Lanao del Norte ng kauna-unahang Mindanao Youth Games sa susunod na taon, na sasalihan ng libu-libong 18-anyos pababa mula sa 33 lungsod sa anim na rehiyon ng Mindanao at isang panauhing koponan mula Timor Leste.

Ayon sa Press release ng Philippine Sports Commission (PSC) noong Lunes, ang event na nakatakda sa Abril 11-17, 2027, ay gaganapin sa Mindanao Civic Center sa Tubod at magtatampok ng 12 hanggang 15 na sports, kabilang ang football, athletics, swimming, basketball, volleyball, archery, tennis, combat sports, at weightlifting.

“The Mindanao Youth Games will showcase the best of our young athletes and position Lanao del Norte as a hub for sports tourism. Hosting this event is not just about competition; it is about peace, development, and giving our youth a platform to shine,” wika ni Lanao Del Norte provincial administrator Lyndon Calica, na kinatawan si Lanao Del Norte Governor Mohamad Khalid.

Ang Mindanao Civic Center, isang malawak na 66-hektaryang kompleks, ay kinikilala bilang isa sa mga nangungunang lugar para sa sports sa bansa. Dito ginanap ang 2023 Palarong Pambansa.

Mayroon itong football pitch na sertipikado ng FIFA, track and field oval na sumusunod sa pamantayan ng World Athletics, Olympic-size na swimming pool kasama ang 25-meter na training pool, gymnasium na may 5,000 na upuan para sa basketball at volleyball competitions, at mga espesyal na lugar para sa archery, tennis, combat sports, at weightlifting.

Sa tulong ng PSC at Philippine Amateur Baseball Association (PABA), pinalalawak ng probinsya ang lugar sa pamamagitan ng pagtatayo ng baseball at softball diamond.

Samantala, sinamahan nina PSC chairman John Patrick Gregorio at Commissioner Matthew Gaston si Lanao del Norte Rep. Imelda Quibranza-Dimaporo at si Calica sa National Academy of Sports (NAS) sa New Clark City sa Capas, Tarlac noong nakaraang Sabado.

Kasama rin ang NAS deputy executive director na si Emil Arroyo, naglibot sila sa campus, na may mga makabagong pasilidad, kabilang ang mga dormitoryo.

“The NAS is designed to nurture the finest grassroots athletes and prepare them to become medal-winning national athletes. Replicating such a facility in Mindanao will give young athletes from the region the same opportunities to reach their dreams without having to leave home too early,” tugon ni Gregorio.