Yulo, Yape pinakamalaking matatanggap na Asian Games cash bonus

ANG gymnast na si Carlos Yulo at ang taekwondo jin na si Jeus Yape ang nanguna sa pagkakakuha ng pinakamalaking cash incentive sa mga Pilipinong atleta na nag-medalya sa katatapos lang na 20th Asian Games sa Japan.

Sa ilalim ng Republic Act 10699 o ang National Athletes and Coaches Benefits and Incentives Act, ang mga nanalo ng ginto sa Asian Games ay makakatanggap ng P2 milyon mula sa gobyerno habang ang mga nanalo ng pilak at tanso ay makakatanggap ng P1 milyon at P400,000, ayon sa pagkakasunod.

Sa pagkapanalo ng dalawang gintong medalya sa floor exercise at vault titles, makakakuha si Yulo ng kabuuang P4 milyon.

Sa kabilang banda, makakakuha si Yape ng P2.4 milyon para sa kanyang ginto sa mixed individual virtual taekwondo at tanso sa men’s individual poomsae.

Si Yape ang nagsilbing tagapagdala ng watawat ng Pilipinas sa closing ceremony ng Asiad noong Linggo.

Si pole vaulter Ernest John ‘EJ’ Obiena ay naging pangatlong pinakamataas na kumita mula sa Games na may P2 milyon para sa pagkamit ng pangalawang sunod na ginto sa kanyang isport.

Karapat-dapat din si Obiena sa karagdagang insentibo matapos siyang magtala ng bagong rekord sa meet sa kanyang 5.91-metrong talon.

Nagtapos ang Pilipinas sa ika-17 puwesto sa Asiad na may apat na ginto, siyam na pilak, at 16 na tanso na katumbas ng P23.4 milyon sa cash incentives.

Samantala, makakatanggap din ang mga coach ng Team Philippines ng cash incentives na katumbas ng kalahati ng incentives ng mga atletang kanilang sinanay o tinraining.

Ayon sa Seksyon 9 ng Republic Act 10699, may karapatan ang mga coach sa cash incentives ““if they have personally trained and rendered service to the athletes or teams who win in international competitions at least six months prior to the international competition.”

Sa kaso ni Yulo, makakatanggap si coach Aldrin Castaneda ng P2 milyon.