DSWD SEC. TULFO IBA-BYPASS NG CA – SENATE PRESIDENT

KINUMPIRMA ni Senate President Juan Miguel Zubiri na tuluyan nang iba-bypass ng makapangyarihang Commission on Appointments si Department of Social Welfare and Development (DSWD) Secretary Erwin Tulfo.

Sa pulong balitaan, sinabi ni Zubiri na hindi palulusutin pa ng CA ang ad interim appointment ng Kalihim sa DSWD.

“He will be bypassed this coming month and then he’ll have to be reappointed by the President shortly after that,” wika ni Zubiri.

Ayon kay Zubiri, sa kasaysayan ng CA ay wala pa aniya nakalulusot na isang appointed secretary na mayroong conviction mula sa Supreme Court.

Matatandaan na-suspend ang confirmation hearing ni Tulfo kamakailan nang maungkat ang pagkaka-convict niya sa mga kasong Libel.

Dagdag pa ni Zubiri, iimbitahan din ng CA ang ilang mahistrado para talakayin ang isyu sa citizenship ni Tulfo.

Nabunyag sa confirmation hearing ni Tulfo ang pagiging American citizen niya nang mag-serve ito sa US Military.

“The matter regarding the DSWD is a bit more complicated because we have even invited justices to weigh in on two things—the issue about his citizenship and the issue regarding his conviction with finality at the Supreme Court,” paliwanag ni Zubiri.

Aminado si Zubiri na nanghihinayang siya kay Tulfo ngunit wala silang magagawa dahil kailangan pang resolbahin ang ilang isyu ng Kalihim.

Bagama’t tiyak nang maba-bypass, itutuloy parin ang deliberation ng CA sa susunod na taon pagkabalik ng mga Kongresista mula sa kanilang holiday break.

“I like Secretary Tulfo. I’ll be honest about it…. Gusto ko siya. Masipag siya,” ani Zubiri. “Sayang. Nasasayangan ako sa kanya… But we have to perform our constitutional mandate to make sure we vet out the members of the Cabinet that have no legal impediments.”

“There are legal impediments and there are legal issues that we still have to resolve. Hopefully, we will be able to fix all these legal impediments,” diin ni Zubiri. (Mylene Alfonso)