OFW minaltrato ng amo, ninakawan pa ng kabaro

Nangako ang Over­seas Workers Welfare Ad­ministration (OWWA) na tutulungan nila ang isang overseas Filipino worker (OFW) mula Kuwait nang makaranas ng pagmamaltrato sa kan­yang mga amo at niloko pa ng mga kapwa Pilipino.

Kinilala ang OFW na si Maribel Cantillo, tubong Aurora.

Ayon kay Cantillo, dalawang taon siyang nagtrabaho bilang do­mestic helper sa Kuwait at ni minsan hindi siya pinayagan ng kanyang amo na mag-day-off.

Bukod dito, hindi siya binabayaran nang tama, kung saan sa halip na P43,000 kada buwan nasa P8,000 lamang ang binabayad sa kanya.

“Marami po akong ano sa kanya. Mayroon ‘yong itinulak niya ako sa hag­dan – buti po, nasalo ako. Mayroon ‘yong sabuyan ka ng tubig. Marami po akong ano doon pero hin­di po ako nagsalita. Tiniis ko lang po,” kuwento ni Cantillo.

Maging bago umuwi ng bansa si Cantillo hindi man lang binigyan ng pag­kain bago umalis.

May mga nagmagan­dang-loob na kapwa Pinoy at tinulungan siya habang nasa gitna ng bi­yahe pauwi ng bansa. Ang problema, ilang kapwa OFW ang ninakaw ang mga perang binigay kay Cantillo habang nasa gitna ng Covid-19 quarantine pagkauwi sa Maynila.

Kaya naman nangako ang OWWA na ‘di nila pababayaan si Cantillo.