May-ari ng Crocodile Farm patay sa aksidente

Nasawi sa isang highway accident ang isang popular na negosyante na may-ari ng Davao City Crocodile Farm na isang landmark at sikat na tourist destination sa naturang lungsod nitong Linggo, sa Bansalan, Davao del Sur.

Sa ulat, sakay ang 64-anyos na si Philip Dizon ng kanyang three-wheeled Can-Am na motorsiklo na bumaligtad at gumulong sa isang bahagi ng highway sa bayan ng Bansalan dahil sa pag-iwas nito sa isang sasakyan na mula sa kasalubong.

Sa hiwalay na pahayag nitong Lunes ng Bansalan Municipal Police Station at ng Davao del Sur Provincial Police, hindi na umabot ng buhay sa pagamutan si Dizon kung saan siya isinugod ng mga emergency responders upang malapatan sana ng lunas.

Si Dizon ay may-ari ng Crocodile Farm sa Maa, Davao City na kanyang itinatag mahigit isang dekada na ang nakakalipas upang makatulong sa crocodile conservation program ng pamahalaan na naging isang landmark at major tourist attraction na sa buong Region 11.

At may ari din ito ng isang eco-tourism site, ang Apo Highland Resorts sa Kapatagan, Davao del Sur, at mga orchards at exotic fruit farms na ang produkto at binebenta sa Davao City at sa mga karatig na mga probinsya.