PNP AT BATANG ECOZONE NAGKAISA LABAN SA DROGA, BULLYING AT KRIMEN

Nagkaisa ang Tanza Municipal Police Station (MPS), Batang Ecozone, lokal na pamahalaan, mga guro, magulang, at iba’t ibang sektor ng komunidad sa pagsasagawa ng HOPE Tanza (Holistic Offensive Prevention & Engagement for Transforming Accountability: Nurturing Zones that are Safe for All) Orientation para sa mga mag-aaral ng Tanza Trade School noong Hulyo 14, 2026.
Layunin ng programa na mabigyan ng sapat na kaalaman ang mga kabataan hinggil sa mga isyung kinakaharap ng lipunan tulad ng ilegal na droga, paninigarilyo, vaping, bullying, karahasan, at iba pang banta sa kanilang kaligtasan at kinabukasan. Bahagi rin ito ng mas malawak na kampanya ng Philippine National Police (PNP) upang mapalakas ang ugnayan ng pulisya, paaralan, pamilya, at komunidad sa paghubog ng responsableng kabataan.
Pinangunahan ang programa ni PLTCOL Chester Noel R. Borlongan, Chief of Police ng Tanza Municipal Police Station, na nagbigay ng mensahe tungkol sa kahalagahan ng disiplina, pakikipagtulungan, at aktibong partisipasyon ng bawat isa upang mapanatiling ligtas ang mga paaralan at komunidad.
Sa kanyang mensahe, binigyang-diin ni Borlongan na ang kapayapaan at kaayusan ay hindi lamang responsibilidad ng kapulisan kundi ng buong pamayanan. Aniya, ang maagang paggabay sa mga kabataan ay isang mahalagang hakbang upang mailayo sila sa anumang uri ng kriminalidad, bisyo, at impluwensiyang maaaring makasira sa kanilang kinabukasan.
Isa sa mga naging tampok sa programa ang mensahe ni Engr. Jerenato “Jerry” Alfante, Pangulo ng Batang Ecozone, na nagpahayag ng buong suporta ng kanilang organisasyon sa mga programang nagbibigay-proteksiyon at gabay sa kabataan.
Ayon kay Alfante, ang tunay na pag-unlad ng isang komunidad ay nagsisimula sa paghubog ng mga kabataang may disiplina, malasakit, at pananagutan.
“Ang kinabukasan ng ating bansa ay nasa kamay ng ating kabataan. Kung ngayon pa lamang ay mabibigyan na sila ng tamang kaalaman, mabuting pagpapahalaga, at wastong direksiyon, makatitiyak tayong mas magiging ligtas, produktibo, at maunlad ang ating komunidad. Ang Batang Ecozone ay laging handang makiisa sa mga programang nagbibigay ng pag-asa at magandang kinabukasan sa ating mga kabataan,” pahayag ni Engr. Jerry Alfante.
Nagbigay rin ng mensahe si Rolando Dilidili, Principal IV ng Tanza Trade School, na nagpahayag ng pasasalamat sa mga organisasyong nakipagtulungan upang maisakatuparan ang naturang programa. Binigyang-diin niya na mahalaga ang ganitong mga seminar upang madagdagan ang kamalayan ng mga estudyante sa mga isyung panlipunan at mapalakas ang kanilang kakayahang gumawa ng tamang desisyon.
Sinimulan ang programa sa isang panalangin na pinangunahan ni Pastor Ronaldo Tomas, MBK Values Coach, na nagsilbi ring tagapagsalita sa lecture tungkol sa Spiritual Enhancement, kung saan tinalakay ang kahalagahan ng mabuting asal, pananampalataya, at moral na pagpapahalaga bilang sandigan ng mga kabataan laban sa masasamang impluwensiya.
Nagkaroon din ng Pledge of Commitment na nilahukan ng mga kinatawan ng Tanza MPS, mga stakeholder, Parent-Teacher Association (PTA), at mga estudyante bilang simbolo ng kanilang sama-samang paninindigan na panatilihing ligtas, disiplinado, at maayos ang kapaligiran ng paaralan.
Ipinakilala rin ang HOPE Tanza Project sa pangunguna ni PCMS Annaliza P. Flores, Chief ng Police Community Affairs and Services (PCAS) ng Tanza MPS. Ipinaliwanag niya ang layunin ng proyekto na higit pang mapalakas ang ugnayan ng pulisya at komunidad sa pamamagitan ng mga programang pang-edukasyon, preventive awareness, at youth engagement.
Isa sa mga pangunahing bahagi ng aktibidad ang lecture ng ELCAC Team ng Cavite Police Provincial Office (CAVPPO) tungkol sa pagbabawal sa pagdadala ng deadly weapons, paninigarilyo, at vaping. Ipinaliwanag sa mga mag-aaral ang mga umiiral na batas, kaukulang parusa, at ang mga panganib na dulot ng mga ipinagbabawal na gawain.
Nagsagawa rin ng simulation exercise para sa mga guro at estudyante sa pangunguna ni PSSg Angelo Carlo Vallarta, Operations PNCO ng Tanza MPS. Layunin nitong ihanda ang mga kalahok sa tamang pagtugon sa mga emergency at iba pang sitwasyong maaaring maganap sa loob ng paaralan.
Samantala, ibinahagi naman ni Mr. Ray Figueroa, Registered Nurse ng Rural Health Unit (RHU) ng Tanza, ang lecture ukol sa Drug Awareness, kung saan ipinaliwanag ang masasamang epekto ng paggamit ng ilegal na droga sa kalusugan, pamilya, pag-aaral, at kinabukasan ng kabataan.
Tinalakay rin ng ELCAC Team ng CAVPPO ang Rape Awareness at Anti-Bullying, kabilang ang mga karapatan ng mga kabataan, mga umiiral na batas laban sa pang-aabuso, at ang kahalagahan ng agarang pag-uulat sa mga awtoridad ng anumang insidente ng karahasan o pambu-bully.
Nagtapos ang programa sa isang Open Forum na pinangunahan ni PCMS Annaliza P. Flores, kung saan malayang nakapagtanong.