Kandidatong mayor sa Cagayan timbog sa droga

IGUIG, Cagayan – Arestado ang isang high value target (HVT) sa anti-illegal drugs na kandidato sa pagka-alkalde sa Cagayan.

Ang naaresto ay kinilalang si Iguig Sangguniang Bayan member Emerito “Boyet” Gasmen, 50 anyos.

Si Gasmen ay nakahanay sa mga itinuturing na HVT sa lalawigan ng Cagayan.

Inaresto siya sa bisa ng warrant of arrest, na inisyu ni Quezon City RTC Branch 82 Judge Severino B. De Castro noon pang July 12, 2010, ng mga operatiba ni PDEA Regional Director Levi S. Ortiz, NBI CAVRO Director Victor John Paul H. Ronquillo, at COP ng Tuguegarao Police Station Lt. Col. Pepito A. Mendoza. Jr.

Dinakip si Gasmen sa mismong residential house niya sa Ajat, Iguig.

Nahaharap si Gasmen sa kasong paglabag sa Sections 5 at 11 ng RA 9165, Comprehensive Dangerous Drugs Act of 2002.

Si Gasmen ay may balak tumakbong mayor sa 2025 midterm election, na mamanukin ni Cagayan 3rd District Representative Jojo Lara.

Walang itinakdang piyansa ang korte para sa pansamantalang kalayaan ni Gasmen.(REY VELASCO)