Probe sa kaso ng missing sabungeros, palawakin pa – Palasyo

NAKIKITA ng Malakanyang ang pangangailangang magkaroon ng mas malalim at mas malawak pang imbestigasyon kaugnay sa kaso ng mga nawawalang sabungero.

Ito’y matapos lumabas sa intelligence report na posibleng may kaugnayan umano ang ilang personalidad na sangkot sa war on drugs noong administrasyon ni dating Pangulong Rodrigo Duterte.

Una nang isiniwalat ni Department of Justice (DOJ) Secretary Jesus Crispin Remulla na base sa natanggap nilang impormasyon, may posibilidad na konektado ang ilang indibidwal na dating sangkot sa kampanya kontra droga sa misteryosong pagkawala naman ng mga sabungero.

Sa press briefing sa Malakanyang, sinabi ni Palace Press Officer at Presidential Communications Office (PCO) Undersecretary Claire Castro na suportado ni Pangulong Ferdinand Marcos Jr. ang pagpapalawig ng imbestigasyon upang matukoy ang buong lawak ng insidente.

Nilinaw naman ni Castro na wala silang deklarasyong may guilty na sa pangyayari subalit buo aniya ang paninindigan ni Pangulong Marcos na mabigyan ng hustisya ang mga biktima. (Gilbert Perdez/Vanz Fernandez)