Hirit na TRO ng Duterte Youth inisnab ng Korte Suprema

IBINASURA ng Supreme Court (SC) ang kahilingan ng Duterte Youth party-list para sa ‘temporary restraining order’ mula sa utos ng Commission on Elections (Comelec) na nagkansela sa pagpaparehistro nito.

Sa isang resolusyon na may petsang Setyembre 30 na isinapubliko nitong Lunes, tinanggihan ng SC en banc ang kahilingan ng grupo para sa restraining order, writ of preliminary injunction, at status quo ante order, at ibinasura rin ang mosyon nito para sa special raffle.

Inatasan din ng Korte ang Comelec at iba pang respondents sa kaso na magkomento sa loob ng 10 araw.

Kinuwestiyon ng grupo ang dalawang resolusyon ng Comelec — ang resolusyon noong Hunyo 18 na nagkansela sa pagpaparehistro nito, at ang resolusyon noong Agosto 29 na nagpapatibay sa naunang desisyon at ibinasura ang mosyon para sa muling pagpaparehistro ng grupo.

Binawi ng Comelec ang pagpaparehistro ng grupo batay sa petisyon noong 2019 na kumukuwestiyon sa bisa ng pagpaparehistro ng party-list noong 2018.

Sinabi ng mga petitioner na ang petisyon ng party-list group para sa pagpaparehistro ay hindi nailathala sa hindi bababa sa dalawang pahayagan na may pangkalahatang sirkulasyon, at walang maayos na pagdinig na ginanap sa aplikasyon nito para sa akreditasyon, ayon sa kinakailangan sa ilalim ng Party-list System Act.(Jocelyn Domenden)