Grab naglunsad ng diskarte program sa Cavite

NAGLUNSAD ang Grab Philippines ng pinakabagong platform nito, ang Grab Asenso: A Digital Diskarte Program upang suportahan ang micro, small, and medium enterprises (MSMEs) na ginanap sa Molino Bacoor City Cavite.

Ang programa sa ilalim ng hashtag na #GrabAsensoCavite, ay naglalayon na bigyang kapangyarihan ang mga lokal na negosyante sa pamamagitan ng pagbibigay sa kanila ng mahahalagang digital na tool at pagsasanay upang matulungan silang makipagkumpitensya sa isang marketplace na mas pinalakas ng teknolohiya.

Nag-aalok ang programa ng mga mobile-first na solusyon na idinisenyo para sa mga maliliit na may-ari ng negosyo, kabilang ang suporta sa negosyo na pinapagana ng AI, mga cashless na sistema ng pagbabayad, at mga tool sa marketing na magagamit sa Grab platform.

Ang programang ito ay naglalayon ma i-streamline ang mga operasyon, pataasin ang pag-abot sa merkado, at palakasin ang kakayahang kumita para sa mga MSME sa buong lalawigan.

Sa paglulunsad, ang mga kalahok ay nakibahagi sa mga hands-on workshop at onboarding session sa pangunguna ng mga kinatawan ng Grab sa pakikipagtulungan ng Department of Information and Communications Technology (DICT) at mga local government units.

Natutunan ng mga negosyante mula sa iba’t-ibang sektor—mula sa mga food stall at café hanggang sa mga retail shop—kung paano i-digitize ang kanilang mga negosyo, mag-set up ng mga online storefront, at tumanggap ng mga electronic na pagbabayad.

Itinampok din ng kaganapan ang mga kwento ng tagumpay mula sa mga merchant ng Grab na nakinabang na mula sa digital ecosystem ng kumpanya. (Irine Gascon)