3 kabataan nasawi sa salpukan ng motor at bus

NASAWI ang tatlong menor de edad nang bumangga head-on ang sinasakyang motorsiklo sa isang bus sa Barangay Burgos, Cadiz City.
Sa paunang imbestigasyon ng Cadiz City Police Station, bibili ng pagkain ang mga biktima nang mangyari ang aksidente.
Nag-overtake ang motorsiklo sa isa pang sasakyan ngunit hindi agad nakabalik sa tamang linya kaya nabangga ang kasalubong na bus.
“Naghinay-hinay ang bus kasi may bababa raw na pasahero. Ang motorcycle, nag-overtake sa isa ring motorsiklo. However, nag-slant ang direction papunta sa dalawang lane kaya ang nakasalubong niya (na bus), nabangga niya,” ayon kay Lt. Daleen Grace Loreno, hepe ng Cadiz City Police Station.
Iniimbestigahan din ng pulisya ang ulat na posibleng nakainom ang mga biktima bago ang insidente.
“According to witnesses, uminom sila sa pinanggali-ngan nila. However, dini-deny rin ng mga magulang,” dagdag ni Loreno.
Iginiit naman ng kumpanya ng bus, sa pamamagitan ng tagapagsalita nitong si Jade Marquez, na nasa tamang linya ang kanilang drayber at handa silang magbigay ng tulong sa pamilya ng mga biktima.
“Hindi pa lumalapit sa amin ang pamilya. Gusto ko lang i-clarify na no fault kami sa aksidente. Every time may aksidente sa aming units, palagi kasi kaming sinisisi na kasalanan raw ng drayber,” aniya.
Pinalaya na ng pulisya ang drayber ng bus habang nagpapatuloy ang imbestigasyon sa insidente.