BOC-NAIA, NAKASABAT NG P6.8-M ILLEGAL DRUGS SA CMEC
Advertisers
MAY P6.8 milyong halaga ng illegal drugs ang nasabat mula sa abandonadong inbound parcels sa Central Mail Exchange Center (CMEC) sa isang joint interdiction operation na pinangunahan ng Bureau of Customs–Ninoy Aquino International Airport (BOC-NAIA).
Ang nasabing operasyon ay isinagawa nitong April 23, 2026 sa ilalim ng liderato ni Commissioner Ariel Nepomuceno at alinsunod sa direktiba ni President Ferdinand R. Marcos, Jr. na paigtingin ang kampanya laban sa iligal na droga.
Sa kanyang ulat, sinabi ni BOC-NAIA District Collector Atty. Yasmin Mapa na nakumpiska nila ang may kabuuang 4,231 gramo ng pinatuyong dahon ng marijuana kush na nagkakahalaga ng P6,346,500 at 325 pink-colored tablets na hinihinalang ecstasy na nasa P487,500 ang halaga.
“The contrabands were concealed in parcels misdeclared as common consumer goods, including “Mama Cake Durian,” “Dog Food” and “Science Dino-Bot.” The shipments originated from Thailand, the United States, and the Netherlands, and were consigned to recipients in Luzon and Mindanao,” ani Mapa.
Ang naturang operasyon ay isinagawa sa pakikipag-ugnayan sa NAIA Inter-Agency Drug Interdiction Task Group (NAIA-IADITG) at Philippine Drug Enforcement Agency (PDEA).
Ang mga nakumpiska ay nai-turn over na sa PDEA Laboratory Service para sa confirmatory examination at proper disposition, habang inihahanda ang karampatang kaso para sa paglabag sa Section 4, Article II ng Republic Act No. 9165, o ang Comprehensive Dangerous Drugs Act of 2002.
“We reaffirm the BOC-NAIA’s commitment to strengthening border control measures and enhancing inter-agency coordination to prevent the entry of illegal drugs into the country,” pahayag ni Mapa. (JERRY S. TAN)