Petisyon ni Mans binasura ng korte… ‘TULOY ANG IMPEACHMENT VS VP SARA’

IBINASURA ng isang korte sa Quezon City ang petisyon na naglalayong pigilan ang impeachment proceedings ng Kamara laban kay Vice President Sara Z. Duterte, iginiit nito na walang kapangyarihan ang hudikatura na makialam sa konstitusyunal na tungkulin ng House of Representatives kaugnay ng impeachment.

Tinanggihan ng Quezon City Regional Trial Court (RTC) Branch 81 ang petisyong inihain ni Atty. Manases “Mans” Carpio, asawa ng Bise Presidente, na humihiling itigil ang nagpapatuloy na impeachment proceedings laban kay Duterte.

Ibinasura rin ng korte ang kahilingan ni Carpio maglabas ng ‘writ of preliminary injunction’ laban kina Speaker Faustino “Bojie” G. Dy III, House Committee on Justice (HCOJ) chairperson at Batangas Rep. Gerville “Jinky Bitrics” Reyes-Luistro, at BIR Commissioner Charlito Martin R. Mendoza.

Sa limang pahinang kautusan na may petsang Mayo 6, 2026 at isinulat ni Presiding Judge Madonna C. Echiverri, ibinasura ng RTC ang petisyon dahil sa kawalan ng hurisdiksyon.

“The petition for prohibition is DISMISSED for lack of jurisdiction. The prayer for issuance of a writ of preliminary injunction is DENIED,” ayon sa desisyong natanggap ng Kamara.

Layunin ng petisyon na pigilan ang House justice panel sa pagpapatupad ng mga subpoena at iba pang hakbang kaugnay ng impeachment complaints laban kay Duterte, lalo na matapos humiling ang komite ng tax records at iba pang dokumentong konektado sa Bise Presidente at sa kanyang asawa.

Sinabi ng RTC na lehitimong ginagamit ng House panel ang kapangyarihang ipinagkaloob dito ng Konstitusyon at hindi ito maaaring pigilan sa pamamagitan ng prohibition o injunction.

“Respondents do not usurp but are in fact, as members of HCOJ are, by law, constituted to determine the sufficiency of the impeachment complaint against the Vice-President and eventually the determination of probable cause for the filing of the case to the Senate,” ayon sa kautusan.

Binigyang-diin din ng korte, batay sa Article XI ng 1987 Constitution, na ang Kamara lamang ang may “exclusive power to initiate all cases of impeachment.”

Pinagtibay rin ng RTC ang kapangyarihan ng komite na maglabas ng subpoena, sinabing bahagi ito ng kanilang likas na awtoridad upang maayos na maisagawa ang impeachment proceedings.

“Thus, the issuance of the subpoena duces tecum ad testificandum is an inherent power of the Committee, which is validly created by law, to carry out this constitutional mandate effectively in the conduct of its hearing,” saad ng korte.

Tinanggihan din ng RTC ang argumento ni Carpio na walang hurisdiksyon ang House panel sa kanya at sa mga dokumentong may kaugnayan sa kanya at sa Bise Presidente.

“Prohibition issues only against usurpers or those who exercise power which have not been vested by law,” ayon sa desisyon.

Iginiit din ng korte na hindi maaaring gamitin ang injunction upang pigilan ang House panel sa pagtupad sa kanilang konstitusyunal na tungkulin.

“To enjoin the public individuals in the performance of their duty in the determination of the sufficiency of the impeachment complaint is to prevent said body to exercise its quasi-judicial or ministerial functions,” ayon sa order.

Hindi rin pinagbigyan ng RTC ang mosyon ni Carpio na humihiling na kilalanin bilang ebidensya ang mga ulat sa balita at YouTube videos kaugnay ng pagdinig ng Kamara.

“Newspaper articles amount to ‘hearsay evidence, twice removed’ and are therefore not only inadmissible but without any probative value at all whether objected to or not,” paliwanag ng korte.

Sa isang mahalagang bahagi ng ruling, sinabi ng RTC na dapat sana’y sa Korte Suprema inihain ang petisyon dahil ang mga respondent ay bahagi ng kapantay na sangay ng gobyerno.

“In the case at bench, the respondents are acting in the official capacity as part of the HCOJ, a co-equal branch of the government hence, the case at bench should have been filed with the Supreme Court,” ayon sa korte.

Dumating ang desisyon matapos unanimous na makita ng House Committee on Justice ang probable cause upang ma-impeach si Duterte at aprubahan ang Articles of Impeachment para isumite sa plenaryo, na inaasahang boboto sa impeachment articles sa Mayo 11.