3 Pinoy sa Kuwait sugatan sa drone strike ng Iran

SUGATAN ang 3 Pilipino sa Kuwait matapos ang isinagawang drone strike ng bansang Iran.

Batay sa mga lokal na ulat, kabilang sila sa mahigit animnapung nasugatan sa pag-atake ng Iran sa naturang bansa.

Nauna na ring iniulat ang pagkasawi ng isang Indian national sa nasabing drone strike.

Ayon sa Department of Migrant Workers, idinala sa ospital ang dalawa sa mga nasaktang Pilipino dahil nakalanghap sila ng usok, habang kinailangan namang tahiin ang mga sugat ng ikatlong Pilipino sa ulo at kamay.

Dagdag pa ni Migrant Workers Secretary Hans Leo Cacdac, patuloy nilang mino-monitor ang sitwasyon sa Kuwait.