Impeachment Trial vs VP Duterte… MATIBAG ILALANTAD!: NBI PROBE SA ‘HITMAN’ NI VP SARA

SINABI ni House prosecution legal spokesperson Atty. Benjamin “Jay” Tolosa Jr. nitong Linggo na inaasahang magbibigay si National Bureau of Investigation (NBI) Director Melvin Matibag ng mas detalyadong paliwanag sa Senado bilang impeachment court sa Martes, Hulyo 21, kaugnay ng isinagawang imbestigasyon ng NBI sa pahayag ni Vice President Sara Z. Duterte na nag-utos siya ng isang mamamatay-tao upang patayin si Pangulong Ferdinand R. Marcos, Jr.

Sa panayam sa programang “Bantay Balita sa Kongreso” ng dzBB na pinangungunahan nina Nimfa Ravelo at Isa Avendaño-Umali, sinabi ni Tolosa na magiging iba ang testimonya ni Matibag kumpara kina NBI Senior Agent John Mark Calilung at NBI Regional Director Atty. Jeremy Lotoc, na pangunahing humawak sa pagpapatunay sa kontrobersyal na video at sa cybercrime investigation.

Ipinaliwanag ni Tolosa na sa pagdinig kay Lotoc, paulit-ulit na tinanong ng depensa kung ano pa ang mga hakbang na ginawa ng NBI upang matukoy ang sinasabing mamamatay-tao na tinukoy ni Duterte sa kanyang livestream noong Nobyembre 23, 2024.

Ayon kay Tolosa, paulit-ulit ding ipinaliwanag ni Lotoc na hindi saklaw ng Cybercrime Division ang naturang usapin at mas nararapat itong sagutin ng mga intelligence unit ng NBI.

“So dyan po papasok si NBI Director Melvin Matibag. Siya po ang makakapagbigay na linaw tungkol sa masusing investigation na ginawa ng NBI patungkol dito sa mamamatay-tao na kinausap ng bise presidente,” ani Tolosa.

Gayunman, nilinaw ng pribadong prosecutor na ang kaso sa ilalim ng Article IV ng impeachment complaint, na tumutukoy sa ‘grave threats’ o mabibigat na pagbabanta, ay hindi nakasalalay sa pagpapatunay kung may tunay ngang inupahang mamamatay-tao o kung may aktuwal na planong pagpatay.

Aniya, nakasentro ang reklamong impeachment sa hayagang pagbabanta ni Duterte, na ayon sa prosekusyon ay sapat na upang maituring na isang impeachable offense.

“Importante na mayroon na siyang ginawang pagbabanta na labag sa batas at ‘yung sinabi niyang gagawin niya ay isang masamang bagay na labag sa batas at na-produce ang effect na gusto niya na makapagtakot doon sa mga taong pinagbabantaan niya,” dagdag ni Tolosa.

Nakatakdang ipagpatuloy ng House prosecution panel ang presentasyon ng kanilang ebidensiya sa Martes, kung saan inaasahang kabilang si Matibag sa mga susunod na testigong ihaharap upang suportahan ang Article IV ng Articles of Impeachment, na nag-aakusa kay Duterte ng paggawa ng mga impeachable offense dahil sa umano’y mabibigat na pagbabanta laban sa Pangulo, Unang Ginang, at dating Speaker ng Kamara.