‘Opisina ni Duterte nagpasok ng P15b sa SEA Games organizing committee ni Cayetano’

IBINUNYAG ni National Bureau of Investigation (NBI) Director, Atty. Melvin Matibag, na nagpasok ng P15 billion ang opisina ni dating Pangulo Rodrigo Duterte sa Philippine Southeast Asian Games Organizing Committee (PHISGOC) na pinamunuan noon ni Senador Alan Peter Cayetano para sa 2019 Southeast Asian (SEA) Games.

Ayon kay Matibag, mismong si dating Senador Richard Gordon ang nag-imbestiga sa nasabing isyu at nagawan pa ito ng report.

“Nagkaroon po dapat ‘yan ng Blue Ribbon Committee hearing kungsaan ang dating Senator Gordon, siya po ang chairman ng committee ng Blue Ribbon noon. Meron na po silang ginagawang report,” ani Matibag.

“It’s through the privilege speech of Senator Risa Hontiveros and also there was also a mention that si Senator Ping Lacson noon questioning that pero for some reason, hindi na po natuloy ‘yung hearing na ‘yan,” dagdag pa niya.

Maliban sa Office of the President, mayroon din umanong mga nagbigay ng donasyon na mga pribadong indibidwal at kumpanya.

Dagdag pa ni Matibag, galing sa confidential o intelligence funds ang nasabing pondo.

“Kung titingnan nga po natin ‘yan, meron pa nga pong mga private donors na nagpasok diyan. And there’s an allegation… that has yet to be verified, that the Office of the President meron pong ipinasok na P15 billion pa diyan sa PHISGOC,” ani Matibag.

“It came from confidential or intelligence funds po,” dagdag pa niya.