DIREK NIJEL DE MESA, PINAGSAMA-SAMA ANG PINOY, KOREAN AT JAPANESE ARTISTS SA NDM PLUS 2026 EXCLUSIVE NIGHT

Ni Anne Venancio

Matagumpay ang kauna-unahang NDM PLUS Members Only Gala na ginanap noong Agosto 30, 2026 sa Royal Park Iconic Hotel sa Sakae, Nagoya, Japan.

Dumalo sa espesyal na pagtitipon ang mga filmmaker, artista, aktor, creative, at piling miyembro ng NDM PLUS community mula sa Nagoya at Osaka.

Pinangunahan ang event ng NDM PLUS executives na sina award-winning filmmaker at NDM PLUS Owner, Chairman at CEO Direk Nijel de Mesa, Executive Vice President Jan Christine, actress at Vice President for International Relations Arci Muñoz, actor at Managing Director for NDM Central Japan Artist Orbista, at actress at Managing Director for NDM Osaka Libye Suzuki.

Kabilang din sa mga dumalo sina Fabio Ide, Regine Angeles, Monina Lawrence, Japanese actress Adone Kudo, at Yun Habin ng Korean reality show na Singles Inferno.

Sa event, opisyal na ipinakita at ipinamahagi sa mga miyembro ang NDM PLUS Passports at exclusive luxury sweaters bilang simbolo ng kanilang pagiging bahagi ng international community.

Nagkaroon din ng Members Only Gala Awards kung saan kinilala ang ilang miyembro sa kanilang estilo at presensya.

Iginawad ang Best Dressed Lady kay Rica Suzuki, Best Dressed Gentleman kay John Ando, Timeless Elegance kay Belle Llorca Nishime, Red Carpet Royalty kay Rica Yamamoto, Style Icon kay Culene Kitamura, at Star of the Evening kay Chin Arima.

Ayon sa NDM PLUS, bahagi lamang ang gala ng mas malawak nitong layunin na pagsamahin ang cinema, kultura, sining, paglalakbay at entertainment sa isang international community.