Pulis huli sa ‘gun running’

Nahaharap sa patong patong na kaso ang isang aktibong police na sangkot sa pagbebenta ng mga baril nang madakip ng mga elemento ng PNP Integrity Monitoring and Enforcement Group (PNP-IMEG) sa isinagawang entrapment operation sa Bacolod City.

Kinilala ang inaresto na si Police Staff Sergeant Gerwin Arevalo Catolico, nakatalaga sa Bacolod City Police Office, Police Regional Office 6.

Ayon kay BGen Oliver A. Emmodias, Director PNP IMEG, 10:40 ng umaga ng isinagawa ng entrapment operation ng mga elemento ng PNP-IMEG Visayas Field Unit Team 6, Criminal Investigation and Detection Group (CIDG 6) sa Brgy. Estefania, Bacolod City.

Sinabi ni Emmodias na sangkot ang suspek sa pagbebenta ng mga iligal na baril sa lalawigan ng Negros at kalapit na mga lugar.

Nasamsam sa suspek ang 12 piraso ng P 1,000 bills na mark money, 1 unit ng Norinco cal 45 , 2 magazine ng cal 45 at 1 keypad QNET Mobile.

Dinala si Catolico sa CIDG 6 Negros Camp Montelibano, Bacolod City at sumasailalim sa imbestigasyon.

Sasampahan naman si Catolico ng paglabag sa RA 10591 o the “Comprehensive Firearms and Ammunition Regulation Act” at Omnibus Election Code.(Mark Obleada)