Panukala na parusahan ang mga gagawa ng hoax orders pasado na sa Senado

UPANG protektahan ang mga delivery riders, pasado na sa ikatlo at huling pagbasa ang panukala na layuning parusahan ang sinumang gagawa ng mga hoax order, pagkansela ng mga kumpirmadong order at pagtangging tanggapin ang mga hindi pa nababayarang order.

Sa botong 23-0-0, inaprubahanan ang Senate Bill No. 2302, o panukalang Food, Grocery, and Pharmacy Delivery Services Protection Act.
Ang Senate Bill No. 2302 ay inakda nina Senators Lito Lapid, Aquilino “Koko” Pimentel III, Joel Villanueva at Majority Leader Juan Miguel “Migz” F. Zubiri.

Si Pimentel ang nag-sponsor ng panukala.

Ipinagbabawal din sa panukala sa mga food, grocery, at pharmacy delivery service application providers na obligahin ang kanilang mga delivery riders at driver na mag- advance ng pera para sa mga order.

Sa pagkansela naman ng mga confirmed orders, dapat bayaran pa rin ng mga food, grocery, at pharmacy delivery service application providers ang kanilang service fee dahil maikukunsiderang successful transaction ang mga ito.

Bunsod nito, ang kumpanya ang magiging responsable para sa paghahabol para sa bayad mula sa mga kustomer na nagkansela ng mga order.

“This representation recently found out that an additional service called ‘Pabili or Pasabay’ is being offered by online delivery service providers wherein a customer may get the service of the online delivery service platform to buy products. It is the delivery driver or rider who advances the payment,” pahayag ni Pimentel.

“If this bill is passed into law, that arrangement of the driver or rider advancing the money to fulfill an online order shall no longer be allowed,” giit niya.

“It is the online delivery service application (or app) provider who is in business and the delivery driver or rider is just an agent, to use an all-encompassing generic term, of the business. Hence, all losses of the business must be borne by the businessman, the app provi-der,” paliwanag pa ni Pimentel.

Sa ilalim ng panukalang batas, ang mga delivery service provider na lalabag sa batas ay mahaharap sa pagkakulong at/o multang hindi hihigit sa P100,000 at babawiin ang kanilang mga lisensya at permit. (Mylene Alfonso)