Makabayan Bloc ‘Double Standard,’ ‘Ipokrito’

Isang media group na binubuo ng mga dating kadre ng Communist Party of the Philippines–New People’s Army–National Democratic Front (CPP–NPA–NDF), ang Kontra-Kwento, ang hayagang kumastigo sa Makabayan bloc dahil umano sa double standard, duplicity, at political shamelessness kasunod ng mga alegasyong nag-uugnay sa mga dating mambabatas nito sa kuwestiyonableng disbursement ng flood control funds.

Sa artikulong pinamagatang “Lahat ng Sangkot Dapat Managot? Makabayan Bloc, Sangkot sa Flood Control Scam,” tinutukan ng Kontra-Kwento ang umano’y pagkakasangkot ng mga dating kinatawan na sina France Castro, Arlene Brosas, at Raoul Manuel kaugnay ng mga tinaguriang “ghost” flood control projects.

Ayon sa publikasyon, may joint affidavit na nagsasabing malalaking halaga ng pera — na umano’y inilagay sa mga maleta — ang ipinamahagi kaugnay ng mga proyektong nasa papel lamang kahit tumanggap ng bilyon-bilyong piso mula sa national budget para sa flood mitigation.

Iginiit ng Kontra-Kwento na malinaw ang ironiya ng sitwasyon: ang parehong political figures na nagtatag ng kanilang reputasyon sa pagbatikos sa pork barrel, ghost projects, at corruption ay ngayon nahaharap sa mga akusasyong kahalintulad ng kanilang matagal nang tinutuligsa.

“Ang grupo na ito ay madalas na nagpo-pose bilang tagapagtanggol ng mahihirap at kritiko ng korupsyon sa gobyerno… ngunit kapag sila mismo ang inakusahan… ay nagiging doble ang standard,” ayon sa artikulo, na itinuring ang isyu bilang test ng moral consistency.

Binatikos din ng media collective ang umano’y political pretenses — ang pagpapakita ng moral ascendancy sa publiko habang sinasabing sangkot sa parehong gawain na kanilang kinokondena.

Anila, ito ay duplicity na sumisira sa tiwala ng publiko.

Tinuligsa rin ng Kontra-Kwento ang ilang leftist groups na agad nag-dismiss sa mga alegasyon bilang diversionary tactic. Ayon sa kanila, ang pag-label agad sa isyu bilang political distraction ay pag-iwas sa mismong substansya ng mga paratang.

Giit ng artikulo, kung inosente ang mga dating mambabatas, ang tamang tugon ay full transparency at cooperation sa imbestigasyon — hindi reflexive dismissal.

Kinilala rin ng Kontra-Kwento na wala pang court ruling at wala pang nailalabas na public documentary evidence. Ang mga alegasyon ay nananatiling claims na dapat sumailalim sa legal scrutiny.

Gayunpaman, iginiit ng grupo na ang mga lider na humihingi ng accountability mula sa iba ay dapat ding handang sumunod sa parehong standards.

“Sa huli, ang tunay na makabayan ay hindi sa salita kundi sa gawa, at sa pananagutan,” pagtatapos ng artikulo, na inilalarawan ang kontrobersiya bilang credibility test para sa mga dating mambabatas ng Makabayan bloc.