Eala puntirya ang 10th win laban sa 10 tigasin

PUNTIRYA ng Filipino tennis ace na si Alexandra ‘Alex’ Eala ang kanyang ika-10 panalo laban sa mga top 10 na manlalaro habang haharapin niya ang world No. 10 na si Amanda Anisimova ng Estados Unidos sa third round (round of 32) ng WTA 1000 Cincinnati Open sa Ohio.

Hawak ni World No. 20 Eala ang 9-4 record sa panalo-talo laban sa mga top 10 na manlalaro.

Layunin ng 21-anyos na si Eala ang kanyang ikaanim na sunud-sunod na panalo laban sa mga top 10 na manlalaro, kapag hinarap niya ang 24-anyos na si Anisimova Lunes ng gabi o maagang Martes sa Maynila.

Habang sinusulat, hindi pa naipapahayag ang ayos ng laro para sa mga laban Lunes.

Umakyat si Eala sa ikatlong round matapos idispatsa ang world No. 77 Elena-Gabriela Ruse, 6-1, 3-0 (ret.) noong unang bahagi ng Linggo sa Maynila.

Napagtagumpayan ng kinatawan ng Pilipinas ang 8 sa kaniyang huling 9 na laban.

Samantala, tinalo ng 4-time champ na si Anisimova ang world No. 50 na si Zeynep Sönmez, 6-2, 6-3, upang ihanda ang kaniyang unang laban kay Eala.

Ang huling laban ni Eala kontra top 10 na manlalaro ay kay world No. 3 Jessica Pegula sa 500 Mubadala DC Open final dalawang linggo na ang nakalipas.

Tinalo ni Eala si Pegula, 4-6, 6-4, 6-0, sa kanyang unang Tour-level title.

Pagkatapos matalo kay world No. 2 Elena Rybakina sa third round ng Italian Open, 4-6, 3-6, noong Mayo, sinimulan ni Eala ang kanyang sunod-sunod na panalo sa pamamagitan ng pagbawi laban sa parehong manlalaro sa second round ng Berlin Open, 7-5, 6-4, noong Hunyo 18.

Nagpatuloy si Eala sa panalo laban sa noo’y world No. 8 na si Elina Svitolina sa quarterfinals ng Berlin, 6-3, 6-4, noong Hunyo 20.

Nakuha ni Eala ang kanyang ikatlong sunod na panalo laban sa isang top 10 player sa third round ng Wimbledon, kung saan tinalo niya ang noo’y world No. 3 at defending champ na si Iga Swiatek, 7–6(9), 6–2.

Umulit si Eala laban sa world No. 10 na si Svitolina sa Mubadala DC , 6-3, 6-4, bago niya makuha ang kanyang ikalimang sunod-sunod na panalo laban kay Pegula.