Kaso sa confi funds ni VP Sara target tapusin ng prosecution sa Sept. 9

PLANO ng House prosecution panel na tapusin sa Setyembre 9, ang presentasyon ng ebidensya laban kay Vice President Sara Duterte kaugnay ng umano’y maling paggamit ng confidential funds.

“So just a good news for our senator-judges: we plan to finish the presentation of evidence for confidential fund until September 9, this coming Wednesday,” ayon kay House lead prosecutor Rep. Gerville “Jinky Bitrics” Luistro.

Ipagpapatuloy ng Senate Impeachment Court ang pagdinig bukas Setyembre 7 hanggang 9, kung saan limang testigo ang inaasahang ihaharap ng prosecution.

Kabilang sa mga testigong ihaharap ng prosecution sina dating DepEd special disbursing officer Edward Fajarda, DepEd Assistant Secretary Sunshine Charry Fajarda, PSA Assistant National Statistician Marizza Grande, Police Maj. Jovelyn Magay at COA employee Bresilio Sabaldan.

Posibleng hindi na humarap si Edward Fajarda matapos siyang ma-stroke.

Ayon kay Luistro, nakikipag-usap sila sa depensa para mapalitan ng stipulation ang kanyang testimonya upang hindi na siya sumailalim sa pagdinig.

Samantala, sinabi ni dating DepEd official Michael Poa na nalaman niya sa isang pagdinig sa Kamara na iniulat ni Fajarda na naibigay niya kay Col. Dennis Nolasco ang tatlong tig-P37.5 milyong confidential fund ng DepEd noong 2023.

Inaasahang titingnan naman sa testimonya ni Grande ang mga rekord ng PSA, partikular ang pagkakakilanlan ng mga taong lumitaw sa mga acknowledgment receipt na ginamit sa liquidation ng confidential funds.

Ang target na Setyembre 9 ay para lamang sa Article I.

Nakapaghain na ng ebidensya ang prosecution sa Article IV tungkol sa umano’y pagbabanta, habang hindi pa naihaharap ang ebidensya sa Article II tungkol sa unexplained wealth.

Pinag-aaralan din ng prosecution kung hindi na itutuloy ang Article III tungkol sa umano’y bribery upang mapabilis ang impeachment trial.