P7.7-B budget ng Senado sa 2027 lusot na sa Senate Committee on Finance

PASADO na sa Senate Committee on Finance ang panukalang P7.7-bilyong budget ng Senado para sa Fiscal Year 2027, kasabay ng panukalang pondo ng Senate Electoral Tribunal (SET) at Commission on Appointments (CA), sa isinagawang pagdinig nitong Huwebes, Oktubre 22.

Sa budget presentation, inilahad ni Senate Secretary Renato Bantug Jr. ang panukalang pondo ng Senado, na naglalayong mapanatili ang mahusay na serbisyong pambatas, mapalakas ang mga sistemang institusyonal, maisulong ang digital transformation, at matiyak ang responsableng paggamit ng pondo ng bayan.

Ayon kay Bantug, ang P7.7-bilyong panukalang budget ay P187.5 milyon o 2.5 porsiyentong mas mataas kumpara sa net budget ng Senado noong 2026, ngunit P863 milyon o 10.1 porsiyentong mas mababa kaysa sa 2026 General Appropriations Act (GAA).

Sa ulat ni Bantug, nakapagtala ang Senado ng 68 session days noong 2025, kung kailan 1,694 na panukalang batas at 313 resolusyon ang inihain. Sa kabuuan, 197 panukalang batas ang naging Republic Acts sa naturang taon, kabilang ang mga hakbang para sa reporma sa pamahalaan, fiscal autonomy ng hudikatura, digital governance, pagpapalawak ng telecommunications connectivity, career progression ng mga guro at school leaders, at reporma sa right-of-way acquisition.

Mula Enero hanggang Hunyo 2026, nagsagawa naman ang Senado ng karagdagang 33 session days at nakapagtala ng 653 panukalang batas at 249 resolusyon. Batay sa datos hanggang Oktubre 15, 2026, 13 panukalang batas ang naging Republic Acts, habang 16 ang naipadala na para sa pag-apruba ng Pangulo, anim ang nakabinbin sa Conference Committee, 38 ang naaprubahan sa ikatlo at huling pagbasa, at 19 ang nakabinbin sa ikalawang pagbasa.

Iniulat din niya na walang audit suspensions, disallowances, o charges para sa naturang fiscal year.