Senator-Judges dapat ‘shut up’ lang! ESCUDERO SINOPLA NI CARPIO

SINOPLA ni retired Supreme Court Senior Associate Justice Antonio Carpio si Senate President at Impeachment court presiding officer Francis “Chiz” Escudero sa pagbibigay nito ng komento ukol sa impeachment case laban kay Vice President Sara Duterte.

Tinukoy ni Carpio na hindi siya nagbigay ng anumang komento noon kaugnay sa pagdismis ng Senado sa impeacment case ni dating Ombudsman Merceditas Gutierrez dahil miyembro at bahagi siya ng Korte Suprema.

“I was in the Supreme Court since 2001, and as a member of the Supreme Court, I cannot be complaining because that case could reach us,” paglilinaw ni Carpio.

Ang pahayag ni Carpio ay may kaugnay sa paghawak ng Senado sa impeachment case bilang impeachment court.

“[T]here is a provision in the Senate rules on impeachment. It says, the presiding officer and the senator-judges shall refrain from commenting on the merits of the impeachment case. So dapat sila huwag mag-comment,” diin ni Carpio sa isang panayam.

Binigyang-linaw ni Carpio na maari na siyang magbigay ng komento sa kasalukuyan dahil nasa pribado na siyang buhay bilang mamamayan ng bansa.

“[T]he gag rule is there in the Senate rules. The Senate — the presiding officer, and the senator-judges — shall refrain from commenting publicly on the merits of the impeachment case,” giit ni Carpio.

Magugunita noong Hunyo 10 ay nag-convene ang Senado bilang impeachment court, kungsaan sa botong 18-5 ay ibinalik sa Kamara ang article of impeachment sa pagtitiyak na hindi nila tinatalikuran ang kanilang resposibilidad sa reklamo kasunod ng mosyon na inihain ni Senador Ronald “Bato” dela Rosa na inamyendahan naman sa huli ni Senador Alan Peter Cayetano.

Nilinaw din ni Carpio na hindi rin maikukumpara ang sitwasyon ni Gutierrez dahil nagbitiw na siya sa puwesto at hindi na siya public officer kung kaya’t wala nang dahilan upang magkaroon pa ng paglilitis kumpara sa kaso ni Duterte hanggang sa kasalukuyan ay nanatili parin sa kanyang puwesto.

Nanindigan din si Carpio na kung sa kasalukuyan ay bahagi pa siya ng Korte Ssuprema o ng impeachment court ay hindi siya maglalakas ng loob na magbigay ng anumang komento ukol sa kaso ni Duterte.

Kaugnay nito, suportado ni constitutional law professor at lawyer Howard Calleja ang bagong pahayag ni Carpio.

Ayon kay Calleja, marapat lamang na manahimik ang senators/judges bilang bahagi ng kanilang judicial ethics.

“Justice Carpio was a member of the Supreme Court when former Ombudsman Gutierrez was impeached. Of course, Justice Carpio did not comment because a sitting magistrate does not comment on those matters that may reach the Supreme Court. With more reason that a senator-judge in impeachment proceedings should not comment on matters already pending before the impeachment court,” paliwanag ni Calleja.