MMDA nilabag ang batas sa pagtanggap ng ‘reward money’ mula kay Chavit Singson

NILABAG ng Metropolitan Manila Development Authority (MMDA) ang batas nang tanggapin nito ang P200,000 reward money na inialok ni ex-Governor Luis “Chavit” Singson sa mga traffic enforcer na nag-flag sa kanyang convoy dahil sa paggamit ng EDSA Busway, sinabi ng Civil Service Commission (CSC).

Ayon kay CSC Commissioner Aileen Lizada, labag sa batas ang naturang gawain, na binanggit ang Section 7 ng Republic Act (RA) No. 6713 (Code of Conduct and Ethical Standards for Public Officials and Employees).

Nakasaad sa Seksyon 7 ng RA No. 6713 na “public officials and employees shall not solicit or accept, directly or indirectly, any gift, gratuity, favor, entertainment, loan or anything of monetary value from any person in the course of their official duties or in connection with any operation being regulated by, or any transaction which may be affected by the functions of their office”.

“Kung maraming magba-violate ang magbibigay ng pera kasi hinuli sila at ilalagay sa General Fund, there will be now another source of money coming in na dapat ho hindi,” saad ni Lizada sa PTV-4 Bagong Pilipinas Ngayon.

“Bayad na kami, ang aming sweldo, ng taumbayan. You don’t have to reward us for doing our work,” paliwanag niya.

“Sa pananaw ko po…sa Batas 6713, bawal po,” dagdag pa niya.

Kinumpirma ni MMDA Chairperson Romando Artes na tinanggap ng ahensya ang reward money na iniaalok ni Singson. Gayunpaman, sinabi niya na ang pera ay ilalaan sa pangkalahatang pondo ng MMDA.

“‘Yung binigay ni Gov. Chavit na P200,000 ay pupunta sa General Fund ng MMDA, di po ‘yan idi-distribute sa partikular na tao o grupo. Ico-consider po ‘yan na donation sa ahensya, not for a specific purpose but pupunta sa General Fund na kailangan i-allocate ng Metro Manila Council bago gastusin,” wika ni Artes.

“No strings attached po ‘yan, hindi po ibig sabihin na pwede na dumaan si Gov. Chavit sa Busway. Wala pong exemption ‘yan,” aniya pa.

Matatandaan na nag-alok si Singson noong nakaraang linggo ng P100,000 cash reward sa MMDA enforcers na humarang sa kanya sa hindi awtorisadong paggamit ng EDSA Busway noong Abril 8.

Kalaunan, tinaasan ni Singson sa P200,000 ang reward at personal na bumisita sa MMDA main office sa Pasig City para i-turn over ang pera.